தமிழக காங்கிரஸ் கட்சியைச் சேர்ந்த மூத்த நிர்வாகிகள் சிலர், திமுக ஆட்சியில் தங்களுக்குப் பங்கு வேண்டும் என்று சமீபகாலமாகப் பொதுவெளியில் பேசி வருவது பெரும் விவாதத்தைக் கிளப்பியுள்ளது. இது திமுக-காங்கிரஸ் கூட்டணிக்குள் விரிசலை ஏற்படுத்துமோ என்ற அச்சம் நிலவிய நிலையில், காங்கிரஸ் தலைவர் செல்வப்பெருந்தகை தனது கட்சி நிர்வாகிகளுக்குக் கடுமையான கட்டுப்பாடுகளை விதித்து அறிக்கை வெளியிட்டுள்ளார்.

அதில், தமிழ்நாட்டில் பாஜக காலூன்றத் துடிப்பதாகவும், அதற்கு இடம் கொடுக்காத வகையில் இந்தியா கூட்டணி கட்டுக்கோப்பாக இருக்க வேண்டும் என்றும் அவர் வலியுறுத்தியுள்ளார். ராகுல் காந்தி டெல்லியில் வகுப்புவாத சக்திகளை எதிர்த்துப் போராடி வரும் நிலையில், கூட்டணியைப் பலவீனப்படுத்தும் எந்த ஒரு செயலையும் அனுமதிக்க முடியாது என்று அவர் கூறியுள்ளார்.

திமுக-காங்கிரஸ் கூட்டணி குறித்து அகில இந்திய காங்கிரஸ் தலைமை மட்டுமே பேசி முடிவு செய்யும் என்பதால், கட்சி நிர்வாகிகள் யாரும் தன்னிச்சையாகப் பொதுவெளியில் கூட்டணி பற்றியோ, ஆட்சிப் பங்கு குறித்தோ கருத்துச் சொல்லக் கூடாது என்று அவர் அன்போடு கட்டளையிட்டுள்ளார். நமது சிறிய கருத்து வேறுபாடுகள் அதிமுக மற்றும் பாஜக கூட்டணிக்குச் சாதகமாக அமைந்துவிடக் கூடாது என்பதில் காங்கிரஸ் உறுதியாக இருப்பதை இந்த அறிக்கை தெளிவுபடுத்துகிறது.