India vs New Zealand 2nd T20I Marathi Cricket Update: न्यूझीलंडच्या सलामीवीरांनी ज्याप्रकारे सुरुवात केली, ते पाहता भारतासमोर धावांचा डोंगर उभा राहिल असे वाटले होते. पण, हर्षित राणाने पहिला धक्का दिला आणि त्यानंतर भारतीय गोलंदाजांमध्ये जोश भरला.. त्यांनी उत्तम मारा करताना न्यूझीलंडला अपेक्षेपेक्षा कमी धावसंख्येवर रोखले. कुलदीप यादवने दोन विकेट्स घेतल्या. हर्षित राणा व वरुण चक्रवर्थी यांनीही महत्त्वाच्या फलंदाजांना माघारी पाठवले.

सूर्यकुमार यादवने टॉस जिंकून प्रथम गोलंदाजीचा निर्णय घेतला. अक्षर पटेल आणि जसप्रीत बुमराह यांच्या जागी हर्षित राणा व कुलदीप यादव यांची प्लेइंग इलेव्हनमध्ये निवड झाली आहे. फलंदाजीला आलेल्या डेव्हॉन कॉनवे आणि टीम सेईफर्ट यांनी आक्रमक सुरुवात केली. अर्शदीप सिंगच्या पहिल्याच षटकात १८ धावा डेव्हॉन कॉनवेने चोपल्या. त्यानंतर टीम सेइफर्टने तिसऱ्या षटकात अर्शदीपला सलग चार चौकार हाणले. पण, चौथ्या षटकात हर्षित राणाने सामना फिरवला.

हर्षितने चेंडूची गती थोडी कमी केली आणि कॉनवेला मोठा फटका मारण्यास भाग पाडले. हार्दिक पांड्याने मिड ऑफवर सोपा झेल टिपला. कॉनवे ९ चेंडूंत ३ चौकार व १ षटकार खेचून १९ धावांवर माघारी परतला. हर्षितने ते षटक निर्धाव टाकले. पुढच्याच षटकात वरुण चक्रवर्थीने किवींना मोठा धक्का दिला. गुगलीवर मोठा प्रयत्न मारण्याच्या प्रयत्नात सेइफर्ट २४ धावांवर झेलबाद झाला. पॉवर प्लेच्या शेवटच्या षटकात हर्षितच्या गोलंदाजीवर रचिन रवींद्रने १९ धावा चोपून संघाला २ बाद ६४ धावांपर्यंत पोहोचवले.