जिंजी किल्ला ते शहाबाज शिवज्योत यात्रा
छत्रपती शिवाजी महाराज जयंतीनिमित्त वादळ शिवज्योत मंडळाचा उपक्रम
पोयनाड, ता. ३ (बातमीदार) : वादळ शिवज्योत मंडळ यांच्या वतीने हिंदवी स्वराज्याचे संस्थापक छत्रपती शिवाजी महाराज यांच्या जयंतीनिमित्त जिंजी किल्ला (तमिळनाडू) ते शहाबाज (अलिबाग) अशी शिवज्योत यात्रा आयोजित करण्यात आली आहे. यंदाचे या यात्रेचे २२ वे वर्ष आहे.
छत्रपती शिवाजी महाराजांच्या दक्षिण दिग्विजयाच्या स्मृतिप्रीत्यर्थ जिंजी किल्ल्यासमोर अभिवादन करून २४ फेब्रुवारी रोजी शिवज्योत प्रज्वलित करण्यात आली. त्यानंतर सुमारे १२०० किलोमीटरच्या पायी प्रवासाला प्रारंभ झाला. ४० ते ५० शिवभक्त पाच जणांच्या गटांमध्ये दिवसरात्र ज्योत पुढे नेत आहेत. ही यात्रा तमिळनाडू, आंध्र प्रदेश, कर्नाटक मार्गे महाराष्ट्रात प्रवेश करणार आहे.
६ मार्च रोजी सकाळी १० वाजता शहाबाज गावाच्या वेशीवर शिवज्योतीचे जल्लोषात स्वागत करण्यात येणार असून, छत्रपती शिवाजी महाराजांच्या मूर्तीचे पूजन, मान्यवरांचा सत्कार व सांस्कृतिक कार्यक्रमाचे आयोजन करण्यात आले आहे.