मार्च महिना हा वर्षाच्या सुरुवातीच्या महत्त्वाचा महिना मानला जातो. या महिन्यात जन्मलेल्या व्यक्तींमध्ये काही खास स्वभाववैशिष्ट्ये आणि जीवनातील प्रवृत्ती दिसून येतात.
ज्योतिषशास्त्रानुसार मार्च महिन्यात प्रामुख्याने मीन आणि मेष या दोन राशींचा प्रभाव असतो. त्यामुळे या राशींच्या गुणांचा परिणाम या महिन्यात जन्मलेल्या लोकांच्या स्वभाव, करिअर, आर्थिक स्थिती आणि वैवाहिक आयुष्यावर दिसून येतो.
ज्योतिषतज्ज्ञ डॉ. भूषण ज्योतिर्विद यांनी मार्च महिन्यात जन्मलेल्या व्यक्तींच्या स्वभाव आणि आयुष्यातील विविध पैलूंविषयी सविस्तर माहिती दिली आहे. मार्च महिन्यात जन्मलेल्या व्यक्ती स्वभावाने अत्यंत संवेदनशील आणि दयाळू असतात. इतरांच्या भावना समजून घेण्याची त्यांची क्षमता चांगली असते. कोणालाही मदतीची गरज भासली तर हे लोक तत्परतेने पुढे येतात.
तसेच या महिन्यात जन्मलेले लोक सहसा शांत आणि अंतर्मुख स्वभावाचे असतात. अनेकदा ते स्वतःच्या विचारविश्वात रमलेले असतात. त्यांची कल्पनाशक्ती उत्तम असल्यामुळे कला, संगीत, लेखन किंवा सर्जनशील क्षेत्रांमध्ये त्यांना विशेष आवड असते.
नातेसंबंधांमध्ये आणि कामात प्रामाणिकपणा हा त्यांचा महत्त्वाचा गुण मानला जातो. मात्र कधीकधी ते खूप भावनिक होत असल्यामुळे निर्णय घेताना गोंधळात पडण्याची शक्यता असते. मार्चमध्ये जन्मलेले लोक आपल्या जोडीदाराबद्दल अत्यंत प्रेमळ असतात. कुटुंबाला प्राधान्य देणे आणि नातेसंबंध जपणे ही त्यांची खासियत असते.