• ईडीने उद्योगपती अनिल अंबानी आणि रिलायन्स पॉवरशी संबंधित कंपन्यांवर मोठी कारवाई केली

• मुंबईत १० ते १२ ठिकाणी ईडीच्या पथकांनी छापेमारी

• संआर्थिक व्यवहार आणि संशयास्पद निधी हस्तांतरणाची तपासणी सुरू

अंमलबजावणी संचालनालय म्हणजे ईडीने उद्योगपती अनिल अंबानी यांच्याविरोधात पुन्हा मोठी कारवाई केली. अनिल अंबानी आणि रिलायन्स पॉवरशी संबंधित कंपन्यांवर ईडीने कारवाई सुरू केली आहे. आज पहाटे ईडीच्या पथकांनी मुंबईतील रिलायन्स पॉवर लिमिटेडशी संबंधित १२ ठिकाणांवर छापेमारी केली. ईडीच्या या कारवाईमुळे उद्योग क्षेत्रामध्ये खळबळ उडाली आहे.

मिळालेल्या माहितीनुसार, रिलायन्सपॉवरविरोधात कारवाई करण्यासाठी ईडीच्या सुमारे १५ पथकांनी आज पहाटेपासून शोध मोहीम सुरू केली. ईडीच्या पथकांनी मुंबईतील १० ते १२ ठिकाणी छापेमारी केली. ईडीने ही कारवाई वीज कंपनी रिलायन्स पॉवर लिमिटेडशी संबंधित व्यक्तींच्या निवासस्थानी आणि कार्यालयीन ठिकाणी केली. याठिकाणी ईडीकडून छाडाछडती आणि कागदपत्रांची तापसणी सुरू आहे.

या छापेमारीदरम्यान आर्थिक व्यवहार आणि संभाव्य अनियमिततेबाबत कागदपत्रांची तपासणी केली जात असल्याची माहिती मिळत आहे. दरम्यान, या कारवाईमुळे उद्योगक्षेत्रात मोठी खळबळ उडाली असून ईडीकडून पुढील तपास सुरू आहे. ईडीकडून कारवाई करण्यात आली असताना देखील रिलायन्स पॉवरचे शेअर २ टक्क्यांनी वाढले असून २३ रुपयांवर पोहचले आहे. तर रिलायन्स इन्फ्राचे शेअर्स ४ टक्क्यांवरून अधिक वाढले असून ९४.२० रुपयांवर पोहचले आहे.

ईडीची ही कारवाई मुंबई आणि हैदराबादमधील ठिकाणांवर केंद्रित होती. तपासात अडथळे येऊ नयेत म्हणून अनेक ठिकाणांचे पत्ते ईडीकडून सांगण्यात आले नाहीत. फेब्रुवारी २०२६ मध्ये ईडीने मुंबईतील पॉश एरिया असलेल्या पाली हिल परिसरातील अनिल अंबानी यांचे निवासस्थान अॅबोडवर कारवाई केली होती.

या कारवाईनंतर आता ईडीकडून मुंबईतील कंपनीशी संबंधित १२ ठिकाणी छापेमारी करण्यात आली. कथित आर्थिक अनियमितता आणि मनी लाँड्रिंगच्या व्यापक चौकशीचा भाग म्हणून ही छापेमारी सुरूच आहे. आज ईडीने टाकलेले छापे हे रिलायन्स पॉवरमधील संशयास्पद निधी हस्तांतरण आणि व्यवहारांच्या चौकशीता भाग आहे.