मुंबई : अमेरिकेचे शत्रू म्हटलं की चीन, रशिया, इराण आणि उत्तर कोरिया ही नावं नेहमीच पुढे येतात. मात्र आता या यादीत आणखी एका देशाची भर पडण्याची शक्यता निर्माण झाली आहे, तो म्हणजे पाकिस्तान. अमेरिकेच्या गुप्तचर यंत्रणांनी दिलेल्या नव्या अहवालामुळे ही चर्चा पुन्हा एकदा केंद्रस्थानी आली आहे. आतापर्यंत अमेरिकेचा मित्रदेश मानला जाणारा पाकिस्तानच भविष्यात धोका ठरू शकतो, अशी शक्यता व्यक्त करण्यात आली आहे. यामुळे जागतिक पातळीवर सुरक्षेचे समीकरण बदलण्याची चिन्हं दिसत आहेत.
अमेरिकेच्या राष्ट्रीय गुप्तचर विभागाच्या संचालिका तुलसी गबार्ड यांनी सिनेटसमोर दिलेल्या साक्षीत महत्त्वाची माहिती उघड केली. त्यांच्या मते, रशिया, चीन, उत्तर कोरिया, इराण आणि पाकिस्तान हे देश अण्वस्त्र वाहून नेण्याची क्षमता असलेल्या आंतरखंडीय क्षेपणास्त्रांवर संशोधन करत आहेत. विशेष म्हणजे या क्षेपणास्त्रांच्या मारक क्षमतेत अमेरिका देखील येतो.
याशिवाय, सध्या अमेरिकेला 3,000 पेक्षा अधिक क्षेपणास्त्रांचा धोका आहे. 2035 पर्यंत हा आकडा 16,000 पेक्षा जास्त होऊ शकतो, असंही म्हटलं आहे.
ICBM म्हणजेच Intercontinental Ballistic Missile ही अत्यंत प्रगत आणि विध्वंसक क्षेपणास्त्र प्रणाली आहे. यांचा पल्ला किमान 5,500 किमी असतो. काही आधुनिक ICBM 10,000 ते 15,000 किमीपर्यंत पोहोचू शकतात. पृथ्वीच्या वातावरणाबाहेर जाऊन पुन्हा लक्ष्यावर अचूक प्रहार करतात. त्याचा वेग ध्वनीपेक्षा अनेक पटींनी जास्त असतो. MIRV तंत्रज्ञानामुळे एकाच क्षेपणास्त्रातून अनेक अण्वस्त्रे वेगवेगळ्या लक्ष्यांवर सोडता येतात, ज्यामुळे त्यांची विध्वंसक क्षमता अनेकपटींनी वाढते.
सध्या पाकिस्तानकडे अधिकृतपणे ICBM नसल्याचं मानलं जात असलं तरी, ‘तैमूर’ नावाच्या प्रकल्पावर काम सुरू असल्याची माहिती समोर येत आहे.
संभाव्य रेंज: सुमारे 7,000 किमी
MIRV तंत्रज्ञान वापरण्याची क्षमता
‘अबाबील’ आणि ‘शाहीन-3’ सारखी प्रगत क्षेपणास्त्रे आधीच ताफ्यात
यामुळे पाकिस्तान भविष्यात लांब पल्ल्याच्या अणुहल्ल्यास सक्षम होऊ शकतो, अशी भीती व्यक्त केली जाते.
भारताकडे DRDO ने विकसित केलेलं अग्नी-5 हे अत्याधुनिक ICBM आहे.
रेंज: 5,500 ते 5,800 किमी
अण्वस्त्र वाहून नेण्याची क्षमता: सुमारे 1,500 किलो
रस्ता आणि रेल्वेमार्गाने वाहतूक शक्य
उच्च अचूकता आणि विश्वसनीयता
भारताच्या संरक्षण क्षमतेत यामुळे मोठी भर पडली आहे.
अमेरिकेच्या गुप्तचर अहवालानुसार, जर पाकिस्तानने ICBM तंत्रज्ञानात यश मिळवलं, तर केवळ अमेरिका नव्हे तर भारत आणि इतर देशांसाठीही ही गंभीर बाब ठरू शकते. अण्वस्त्रसज्जता ही स्वसंरक्षणासाठी आवश्यक असली तरी, त्याचा आक्रमक वापर जागतिक सुरक्षेसाठी मोठा धोका ठरू शकतो.
ही बातमी वाचा:
