POS-KUPANG.COM, KUPANG -- Ina Feok masih bajual di pasar ma andia,sakarang dia pung kue su kurang laku. Soalnya, barapa hari ni banyak orang jual kue karena dekat Hari Raya Idul Fitri na.

"Ina kenapa lu pulang su sore bagini. Besok kalo bagini lu jang pulang sa," Ama Tobo tao foe apa ko mangomel dia pung maitua, padahal Ina Feok balom barenti cape ju.

Ina Feok sonde ame pusing, dia hanya diam ko langsung masok pi dalam rumah. Dia barenti cape ko langsung pi bamasak .

‎Ama Tobo dia marah karna dia su lapar, waktu pulang ojek sonde ada makanan andia ko dia tensi naek.

Baca juga: Tapaleuk, Ama Tobo Son Abis Pikir

"Ama kenapa lu pung muka sama ke orang baru abis minum moke," Bai Ndu su muncul di Tobo pung depan.

Ama Tobo sengaja son dengar ko dia ada pangku kaki diam-diam. 

Bai Ndu su tao kalo Tobo model bagitu pasti ada koslet deng dia pung maitua.

"Ama e lu ini dari mana ko muncul malam-malam," Tobo lihat Bai Ndu pegang rokok jadi dia mulai togor supaya bisa dapat sat batang.

Bai Ndu langsung duduk di Tobo pung depan ko carita bilang dia baru pulang nonton pawai malam takbiran.

"Ama Tobo, lu son tahu ko, besok itu su lebaran jadi in malam ada pawai takbiran andia ko beta baru pulang nonton," Bai Ndu jawab lurus-lurus. 

"O andia ko maitua bilang kue brapa hari ini son laku karna orang dong ju ada jual kue mau lebaran," Tobo omong kuat-kuat ko Ina Feok dengar.

"Itu su ama, katong biasa kalo lebaran pasti jalan salamat di tetangga yang muslim dong," Ina Feok su muncul bawa kopi kasi dia pung laki deng Bai Ndu.

"Na ko beta tadi ada lewat kawan SMA yang muslim pung rumah dong su siap kuel, jadi pasti dong habis sembahyang beta mo pi salamat. Katong harus pi ko saling memaafkan deng katong pung sudara yang muslim dong," Bai Ndu umpan Tobo supaya karmana na dong dua pi.

Bai Ndu omong bagitu karena dia mo jalan tapi son tao bawa motor jadi harap Ama Tobo sa.

"Bosong dua mo pi na beta ju nanti mo jalan salamat lebaran di beta pung kawan yang di pasar Inpres sana. Kira bosong dua sandiri yang bisa jalan," Ina Feok son mo kalah te dia ju pikir satu taon satu kali jadi harus jalan salamat.

"Ina e kalo pi salamat di Pasar Inpres situ pasti dapa kue banyak jadi, jang lupa bungkus bawa pulang juga e," Tobo su pesan memang dia pung istri ko pi salamat na bawa tampa ko isi kue lebaran. Selamat Idul Fitri 1447 H. Mohon maaf Lahir dan Batin. (oby lewanmeru)