मुंबईतून मोठी बातमी समोर येत आहे. मिरा-भाईंदरमधील प्लेझंट पार्क परिसरात भीषण आग लागल्याची घटना समोर आली असून, या आगीने काही वेळातच विक्राळ रूप धारण केले. परिसरातील चार ते पाच इमारती या आगीच्या विळख्यात सापडल्याने नागरिकांमध्ये भीतीचे वातावरण निर्माण झाले आहे. मिळालेल्या माहितीनुसार, आग इतक्या वेगाने पसरली की काही घरांनाही तिचा फटका बसला. घटनेनंतर परिसरात धुराचे प्रचंड लोट पसरले असून वातावरण अत्यंत धोकादायक बनले आहे.

मिरा-भाईंदरमधील प्लेझंट पार्क परिसरात लागलेल्या आगीची माहिती मिळताच अग्निशमन दलाच्या अनेक गाड्या घटनास्थळी दाखल झाल्या असून, आग नियंत्रणात आणण्यासाठी शर्थीचे प्रयत्न सुरू आहेत. ही आग आटोक्यात आणण्यासाठी गेल्या काही तासांपासून प्रयत्न सुरू असल्याची माहिती समोर आली आहे. या घटनेमुळे स्थानिक नागरिकांमध्ये भीती आणि चिंतेचे वातावरण पसरले असून, प्रशासनाने परिसर सुरक्षित करण्यासाठी खबरदारीचे उपाय सुरू केले आहेत.

आगीचे नेमके कारण अद्याप स्पष्ट झाले नसून, काही प्राथमिक माहितीनुसार गॅस सिलिंडर स्फोटाची शक्यता वर्तवली जात आहे. त्यामुळे आजूबाजूच्या इतरही इमारतींना मोठा धोका निर्माण झाला आहे. या आगीत दोन ते तीन टेम्पोचे सुद्धा नुकसान झाल्याची माहिती समोर आली आहे. या घटनेत कोणत्याही जीवितहानीची माहिती समोर आली नसली तरी मोठे आर्थिक नुकसान झाले आहे.

अंधेरी पश्चिम येथील लोखंडवाला कॉम्प्लेक्समध्ये इमारतीच्या 9व्या मजल्यावर आग लागली आहे. मेघदूत बिल्डिंच्या बी विंगला ही आग लागली असल्याचे समोर आले आहे. ग्राउंड प्लस 22 मजली इमारतीच्या 9व्या मजल्यावरही आग लागली आहे. घटनेची माहिती समजताच मुंबई अग्निशमन दलाने तात्काळ घटनास्थळी धाव घेतली. पोलिस, रुग्णवाहिका आणि वॉर्ड स्टाफही घटनास्थळी दाखल झाले आहेत. सध्या आगीवर नियंत्रण मिळवण्यासाठी प्रयत्न सुरू आहेत.

कल्याण पूर्वेतील मॉडेल कॉलेज परिसरात टपऱ्यांना भीषण आग लागल्याचे समोर आले आहे. चिंचपाडा रोडवरील मॉडेल कॉलेज परिसरात ही घटना घडली आहे. अचानक लागलेल्या आगीमुळे परिसरात भीतीचे वातावरण पसरले आहे. यामुळे विद्यार्थ्यांची एकच धावपळ पहायला मिळाली, तसेच कॉलेज परिसरात गोंधळ पहायला मिळाला. अग्निशमन दलाने घटनास्थळी दाखल होऊन आगीवर नियंत्रण मिळवले. सुदैवाने कोणतीही जीवितहानी नाही झाली नाही.