Aditi Tatkare News : रायगड जिल्ह्यातील खासदार, राष्ट्रवादीचे प्रदेशाध्यक्ष सुनील तटकरे यांच्या मतदारसंघात एक कार्यक्रम आयोजित केला होता. या कार्यक्रमात जिल्हा परिषद आणि पंचायत समितीला विजयी झालेल्या उमेदवारांचा सत्कार करण्यात आला. या कार्यक्रमाला खासदार सुनील तटकरे, मंत्री आदिती तटकरे उपस्थित होते. विशेष म्हणजे मंचावर जो बॅनर लावला होता. त्यामध्ये सुनील तटकरे, आदिती तटकरे आणि आमदार अनिकेत तटकरे यांचे फोटो होते.

या बॅनवर दिवंगत अजित पवार तसेच राष्ट्रवादीच्या अध्यक्षा, उपमुख्यमंत्री सुनेत्रा पवार यांचे फोटो नव्हते. त्यामुळे तटकरे कुटुंबावर टीका करण्यात येत होती. राष्ट्रवादीचे उपाध्यक्ष उदयकुमार आहेर यांनी उघडपणे नाराजी व्यक्त केली होती. आता या बॅनरबाबत तटकरे कुटुंबातून मंत्री आदिती तटकरे यांनी खुलासा केला आहे.

आदिती तटकरे म्हणाल्या, 'स्थानिक पातळीवर पक्षाच्या कार्यकर्त्यांकडून कार्यक्रम घेतले जातात, असे अनेक कार्यक्रम दिवसभरात होत असतात. अशाच एका ग्रामपंचायत पातळीवरील कार्यक्रमात राष्ट्रवादी काँग्रेस पक्षाचे दिवंगत नेते अजितदादा पवार आणि राष्ट्रीय अध्यक्षा तथा राज्याच्या उपमुख्यमंत्री सुनेत्राकाकी यांचा फोटो नव्हता, याबद्दल मी दिलगिरी व्यक्त करते.'

'अजितदादा असतील, सुनेत्राकाकी असतील यांचं आमच्या मनातील स्थान अढळ आहे. बॅनरवरील फोटोतून आम्हा सगळ्याच कार्यकर्त्यांची निष्ठा ठरवू नये. तरी, यानिमित्ताने एक बरे झाले- स्थानिक कार्यक्रमातील स्थानिक पातळीवर घडलेल्या एका चुकीचा मुद्दा बनवणारी यंत्रणा कशी काम करते हे आमच्या लक्षात आले.'

'हा मुद्दा चवीने चघळणाऱ्यांना दादा हयात असताना त्यांच्यावर केलेल्या टीकेबद्दल मनातून किती पश्चाताप व्यक्त करावा लागत असेल देव जाणे..! बाकी काकींना पक्षाच्या कुटुंबप्रमुख म्हणून आमच्या चुकीबद्दल आमचे कान पकडण्याचा अधिकार आहेच.', असे देखील आदिती तटकरे यांनी म्हटले आहे. या संदर्भात त्यांनी फेसबूक पोस्ट केली आहे.