बॉलिवूडच्या झगमगाटाचे जग बाहेरून जितके आकर्षक आणि ग्लॅमरस दिसते, आतून तितकेच ते एकटेपणाने आणि काही वेदनादायक अनुभवांनी भरलेले असते. अशीच एक गोष्ट प्रसिद्ध प्लेबॅक सिंगर सुनिधी चौहान यांच्या आयुष्यात घडली.
देशातील टॉप गायिकांपैकी एक असलेल्या सुनिधी चौहानने नुकत्याच एका मुलाखतीत आपल्या वैयक्तिक आयुष्यातील सर्वात कडवट आणि वादग्रस्त अध्यायाबद्दल मोकळेपणाने बोलताना आपल्या पहिल्या लग्नाची कहाणी सांगितली आहे. अवघ्या १८ व्या वर्षी सुनिधीने आपल्यापेक्षा १३ वर्षांनी मोठ्या मुस्लिम कोरिओग्राफर बॉबी खान यांच्याशी लग्न केले. त्या वेळी तिच्या वडिलांनी या संबंधाला विरोध केला होता. मात्र प्रेमात आकंठ बुडालेल्या सुनिधीने कुटुंबाचा विचार न करता बॉबी खान यांच्याशी निकाह केला.

मुलाखतीत सुनिधीने स्पष्ट शब्दांत सांगितले, “मी आयुष्यात अनेक चुका केल्या, पण बॉबी खानशी केलेले ते लग्न ही माझ्या जीवनातील सर्वात मोठी चूक होती. सुदैवाने वेळेत मला जाणीव झाली की मी चुकीच्या ठिकाणी अडकले आहे. देवाचे लाख लाख आभार की त्याने मला त्या नात्यातून बाहेर पडण्याची बुद्धी दिली.” सुनिधी आज आपल्या पहिल्या लग्नाला एक मोठा धडा समजते. तिच्या मते, त्या एका चुकीच्या निर्णयामुळे तिला आयुष्याची कडवट बाजू खूप लवकर समजली. त्यामुळे ती अधिक मजबूत आणि खंबीर बनली.