இண்டிகோ விமான நிறுவனத்தின் புதிய தலைமைச் செயல் அதிகாரியாக வில்லியம் வால்ஷ் நியமனம் செய்துள்ளனர். இவர் ஏற்கனவே பிரிட்டிஷ் ஏர்வேஸ் நிறுவனத்தில் அதிகாரியாக இருந்தவர். 2025 டிசம்பரில் இண்டிகோ விமான சேவையில் ஏற்பட்ட பெரும் குளறுபடியால் சி.இ.ஒ. பீட்டர் எல்பர்ஸ் மார்ச் 10-ஆம் தேதி பதவி விலகியதை அடுத்து புதிய சி.இ.ஒ.வாக வில்லியம் வால்ஷ் பொறுப்பேற்கவுள்ளார்.

வால்ஷின் இந்த நியமனம் ஒழுங்குமுறை ஒப்புதல்களுக்கு உட்பட்டது என்று இண்டிகோ விமான நிறுவனம் தெரிவித்துள்ளது. அவர் தற்போது சர்வதேச விமானப் போக்குவரத்து சங்கத்தின் (IATA) தலைமை இயக்குநராகப் பணியாற்றி வருகிறார், மேலும் ஜூலை 31 அன்று அப்பதவியிலிருந்து விலகி ஆகஸ்ட் 03-ஆம் தேதிக்குள் இண்டிகோவில் இணைவார் என எதிர்பார்க்கப்படுகிறது.

விமானப் போக்குவரத்து வட்டாரங்களில் பரவலாக அறியப்படும் வால்ஷ், இந்தப் பதவிக்கு பல தசாப்த கால அனுபவத்தைக் கொண்டு வருகிறார். இதற்கு முன்பு பிரிட்டிஷ் ஏர்வேஸை வழி நடத்தியதோடு, பின்னர் ஏர் லிங்கஸ் மற்றும் ஐபீரியா உள்ளிட்ட பல உலகளாவிய விமான நிறுவனங்களின் தாய் நிறுவனமான இன்டர்நேஷனல் ஏர்லைன்ஸ் குரூப்பின் தலைவராகவும் பணியாற்றியுள்ளார்.