தமிழகத்தில் வரும் ஏப்ரல் 23-ஆம் தேதி நடைபெறவுள்ள 17-வது சட்டப்பேரவைத் தேர்தலில் நான்கு முனைப் போட்டி உறுதி செய்யப்பட்டுள்ள நிலையில், பிரதான கூட்டணிகளில் இடம்பெற்றுள்ள தேசியக் கட்சிகளான காங்கிரஸ் மற்றும் பா.ஜ.க.வில் வேட்பாளர் தேர்வில் கடும் முட்டுக்கட்டை நிலவி வருகிறது. தி.மு.க. தலைமையிலான மெகா கூட்டணியில் 28 இடங்களைப் பெற்றுள்ள காங்கிரஸில், 11 தொகுதிகளுக்கு மட்டுமே வேட்பாளர்கள் இறுதி செய்யப்பட்டுள்ளனர். மீதமுள்ள 17 தொகுதிகளில் வேட்பாளர்களைத் தேர்வு செய்வதில் கடும் போட்டி நிலவுகிறது.

அதன்படி வேளச்சேரி, உதகமண்டலம், ஈரோடு கிழக்கு, சிவகாசி உள்ளிட்ட 14 முக்கிய தொகுதிகளில் சீட் கேட்டுப் பல முனைப் போட்டிகள் நிலவுகின்றன. வேட்பாளர் பட்டியலைத் தயாரிப்பதில் முறைகேடுகள் நடந்ததாகப் புகார்கள் எழுந்துள்ள நிலையில், அகில இந்திய காங்கிரஸ் தலைவர் ராகுல் காந்தி கடும் அதிருப்தியில் உள்ளதாகக் கூறப்படுகிறது. டெல்லியில் முகாமிட்டுள்ள தமிழக காங்கிரஸ் நிர்வாகிகள், தத்தமது ஆதரவாளர்களுக்கு வாய்ப்பு கேட்டு மேலிடத்தை வலியுறுத்தி வருவதால் பட்டியல் வெளியாவதில் தாமதம் ஏற்பட்டுள்ளது.

அ.தி.மு.க. கூட்டணியில் 27 தொகுதிகளைப் பெற்றுள்ள பாரதிய ஜனதா கட்சியிலும் அதிருப்திப் புகைச்சல் கிளம்பியுள்ளது. தாங்கள் கேட்ட முக்கியத் தொகுதிகளை அ.தி.மு.க. ஒதுக்கவில்லை என்பது பா.ஜ.க.வினரின் பிரதான குற்றச்சாட்டாக உள்ளது. பா.ஜ.க. முன்னாள் தலைவர் அண்ணாமலை, கோவை மாவட்டத்தின் சிங்காநல்லூர் அல்லது சூலூர் தொகுதியில் போட்டியிட விரும்பியதாகத் தெரிகிறது. ஆனால், அந்த இரண்டு இடங்களையும் அ.தி.மு.க.வே வைத்துக்கொண்டதால், தற்போது அவர் தேர்தலில் போட்டியிடுவதையே தவிர்க்க முடிவு செய்துள்ளதாகத் தகவல்கள் வெளியாகியுள்ளன.

பா.ஜ.க.வுக்கு ஒதுக்கப்பட்ட இடங்களில் 5 தொகுதிகளை மாற்றிக் கொடுக்குமாறு அக்கட்சி மேலிடம் அ.தி.மு.க.வை வலியுறுத்தி வருகிறது. அ.தி.மு.க. ஏற்கனவே 165 தொகுதிகளுக்கு வேட்பாளர்களை அறிவித்துவிட்டாலும், பா.ஜ.க.வுடனான தொகுதி மாற்றப் பேச்சுவார்த்தை முடிவடையாததால், அறிவிக்கப்பட்ட வேட்பாளர்களும் மனு தாக்கல் செய்யாமல் காத்திருக்கின்றனர். வேட்புமனு தாக்கலுக்கு வரும் 6-ஆம் தேதியே கடைசி நாள் என்பதால், அடுத்த இரண்டு நாட்களில் இந்த இழுபறிகளுக்குத் தீர்வு காண வேண்டிய கட்டாயத்தில் கூட்டணிக் கட்சிகள் உள்ளன.

மேலும் தமிழகத்தின் இரு பெரும் கூட்டணிகளிலும் தேசியக் கட்சிகள் சந்தித்து வரும் இந்த உள்கட்சிப் பூசல்களும், தொகுதிச் சிக்கல்களும் தேர்தல் களத்தில் பெரும் தாக்கத்தை ஏற்படுத்தும் என எதிர்பார்க்கப்படுகிறது.