சர்வதேச அளவில் நிலவி வந்த போர் மேகங்கள் தற்காலிகமாக விலகியுள்ள நிலையில், முதலீட்டாளர்கள் மீண்டும் பாதுகாப்பான முதலீடான தங்கம் மற்றும் வெள்ளியின் பக்கம் திரும்பியுள்ளனர். இதன் காரணமாக இன்று ஒரே நாளில் தங்கம் விலை கணிசமான உயர்வைச் சந்தித்துள்ளது.

அமெரிக்க அதிபர் டிரம்பின் போர்நிறுத்த அறிவிப்பு வெளியானதும், சர்வதேசச் சந்தையில் தங்கம் மற்றும் வெள்ளி விலைகள் மீண்டும் ஏற்றம் கண்டுள்ளன. இன்று காலை நிலவரப்படி, ஒரு அவுன்ஸ் தங்கம் $150 உயர்ந்து $4,807.30-க்கு வர்த்தகமாகிறது. வெள்ளியும் தன் பங்கிற்கு ஒரு அவுன்ஸ் $3.66 உயர்ந்து $76.43-க்கு விற்கப்படுகிறது.

தமிழகத்தில் குறிப்பாகச் சென்னையில், மற்ற நகரங்களை விடத் தங்கம் விலை சற்று கூடுதலாகவே உள்ளது. இன்றைய நிலவரப்படி, 22 காரட்  ஆபரணத் தங்கம் ஒரு கிராம் ₹13,860-க்கும், ஒரு சவரன் (8 கிராம்) ₹1,10,880-க்கும் விற்பனை செய்யப்படுகிறது. 24 காரட் சுத்தத் தங்கம் ஒரு கிராம் ₹15,120-க்கும், ஒரு சவரன் ₹1,20,960-க்கும் விற்பனை ஆகிறது.

தங்கத்தைப் போலவே வெள்ளியின் விலையும் இன்று ஏறுமுகத்தில் உள்ளது. சென்னையில் ஒரு கிராம் வெள்ளி ₹255-க்கும், ஒரு கிலோ வெள்ளி ₹2,55,000-க்கும் விற்கப்படுகிறது.

பொருளாதார நிபுணர்களின் கருத்துப்படி, போர் நிறுத்த ஒப்பந்தம் காரணமாகச் சர்வதேசப் பங்குச் சந்தைகளில் ஒருவித நிதானம் திரும்பியுள்ளது. இருப்பினும், கச்சா எண்ணெய் விலை சரிந்தாலும், தங்கம் ஒரு நிலையான முதலீடாகக் கருதப்படுவதால், அதன் தேவை அதிகரித்துள்ளது. மேலும், வரும் நாட்களில் அமெரிக்காவில் வட்டி விகிதக் குறைப்பு குறித்த சாதகமான முடிவுகள் எடுக்கப்பட்டால், தங்கம் விலை ₹1.50 லட்சம் (10 கிராம்) என்ற இலக்கை நோக்கி நகர வாய்ப்புள்ளதாகக் கணிக்கப்பட்டுள்ளது.