नवी दिल्ली : जगभरातील टेक क्षेत्रात कृत्रिम बुद्धिमत्ता (Artificial Intelligence AI) मुळे नोकऱ्यांवर संकट वाढत असताना मोठी बातमी समोर आली आहे. फेसबुक आणि इंस्टाग्रामची पॅरेंट कंपनी मेटा (Meta) आता सुमारे 16 हजार कर्मचाऱ्यांना कामावरून कमी करण्याच्या तयारीत असल्याची माहिती समोर आली आहे.
कंपनीचे प्रमुख मार्क झुकरबर्ग (Mark Zuckerberg) यांनी एआयवर पूर्ण लक्ष केंद्रित करण्याचा निर्णय घेतल्यामुळे ही मोठी कपात केली जाणार आहे. 20 मेपासून कर्मचारी कपातीची प्रक्रिया सुरू होणार असून पहिल्याच टप्प्यात हजारो कर्मचाऱ्यांवर परिणाम होण्याची शक्यता आहे.
मिळालेल्या माहितीनुसार, 20 मेपासून सुरू होणाऱ्या पहिल्या टप्प्यात सुमारे 8 हजार कर्मचाऱ्यांना नोकरी गमवावी लागू शकते. हा टप्पा कंपनीच्या एकूण कर्मचाऱ्यांच्या जवळपास 10 टक्के स्टाफवर परिणाम करणारा ठरेल.
कंपनीमध्ये ज्या कामांवर एआय सहज काम करू शकते, त्या विभागांतील कर्मचाऱ्यांवर सर्वाधिक परिणाम होण्याची शक्यता आहे. टेक इंडस्ट्रीमध्ये एआयचा वाढता प्रभाव पाहता कर्मचाऱ्यांमध्ये भीतीचे वातावरण निर्माण झाले आहे.
मार्क झुकरबर्ग मेटाला एआय क्षेत्रात अग्रस्थानी आणण्याचा प्रयत्न करत आहेत. यासाठी कंपनी जवळपास 135 बिलियन डॉलरची मोठी गुंतवणूक करण्याच्या तयारीत आहे. या निधीचा मोठा भाग डेटा सेंटर, प्रगत चिप्स आणि एआय सॉफ्टवेअर विकसित करण्यासाठी वापरण्यात येणार आहे.
मेटाने यापूर्वी 2022 आणि 2023 मध्येही मोठ्या प्रमाणावर कर्मचाऱ्यांना कामावरून कमी केले होते. त्या वेळी सुमारे 21 हजार कर्मचाऱ्यांना कंपनीने बाहेरचा रस्ता दाखवला होता. कंपनी आता अधिक ‘स्लिम’ आणि एआय-केंद्रित संरचना तयार करण्याच्या दिशेने वाटचाल करत आहे.
ही समस्या केवळ मेटापुरती मर्यादित नसून संपूर्ण टेक इंडस्ट्रीमध्ये कंपन्या कर्मचारी संख्या कमी करून एआयमध्ये गुंतवणूक वाढवत आहेत. विविध अहवालांनुसार, यावर्षी आतापर्यंत 95 पेक्षा अधिक कंपन्यांनी मिळून 73 हजारांहून अधिक कर्मचाऱ्यांना कामावरून कमी केले आहे.
ही बातमी वाचा :
आणखी वाचा
