31 वर्षीय अपहरण आणि हत्या प्रकरणातील फरार आरोपी सलीम वस्तिक याला दिल्ली पोलिसांच्या गुन्हे शाखेने अखेर अटक केली आहे. आरोपी अनेक दिवसांपासून आपली ओळख बदलत होता आणि स्वतःला YouTuber म्हणून दाखवत होता.
मिळालेल्या माहितीनुसार, 1995 मध्ये दिल्लीतील एका व्यावसायिकाचा 13 वर्षांचा मुलगा संदीप बन्सल याचे अपहरण झाले होते. मुलाची सुखरूप सुटका करण्याच्या बदल्यात आरोपींनी 30 हजार रुपयांची खंडणी मागितली होती. मात्र पैशाची मागणी करूनही मुलाची हत्या करण्यात आली. त्यानंतर सलीमच्या माहितीवरून मुस्तफाबाद येथील नाल्यातून मृतदेह बाहेर काढण्यात आला.
या प्रकरणात सलीम आणि त्याचा साथीदार अनिल यांना 1997 मध्ये अटक करून जन्मठेपेची शिक्षा सुनावण्यात आली होती. मात्र, 2000 साली दिल्ली उच्च न्यायालयाकडून अंतरिम जामीन मिळाल्यानंतर सलीम फरार झाला आणि परत आलाच नाही.
पोलिसांनी दिलेल्या माहितीनुसार, अटक टाळण्यासाठी सलीमने स्वत:ला मृत घोषित केले आणि सलीम अहमद उर्फ सलीम वास्तिक अशी ओळख बदलली. सुमारे २६ वर्षे तो फरार होता. यादरम्यान, तो हरियाणात लपून राहिला आणि नंतर गाझियाबादच्या लोनी भागात महिलांच्या कपड्यांचे दुकान चालवू लागला.
गुप्त माहितीच्या आधारे गुन्हे शाखेच्या पथकाने त्याला अटक केली. पोलीस आता पुढील कायदेशीर कारवाई करत असून या प्रकरणाशी संबंधित इतर पैलूंचाही तपास करत आहेत.
