आयपीएल स्पर्धेच्या 19 व्या मोसमात (IPL 2026) शनिवारी 25 एप्रिलला डबल हेडरमधील पहिल्या सामन्यात पंजाब किंग्सने दिल्ली कॅपिट्ल्सचा धुव्वा उडवत एकूण सहावा विजय मिळवला. पंजाबने दिल्ली विरुद्ध विक्रमी 265 धावांचा यशस्वी पाठलाग करत विजय मिळवला. त्यानंतर या डबल हेडरमधील दुसऱ्या सामन्यात राजस्थान रॉयल्सच्या 15 वर्षीय फलंदाज वैभव सूर्यवंशी याने इतिहास घडवला आहे. युवा फलंदाज वैभवने या मोसमात आपला झंझावात कायम ठेवत हैदराबाद विरुद्धही तडाखेदार बॅटिंग केली आहे. वैभवने राजस्थानमधील सवाई मानसिंह स्टेडियममध्ये अवघ्या 15 चेंडूत अर्धशतक झळकावलं. वैभवचं हे या 19 व्या मोसमातील 15 चेंडूत केलेलं एकूण तिसरं अर्धशतक ठरलं. वैभवने या अर्धशतकी खेळी दरम्यान प्रुफल हिंगे याला सलग 4 षटकार लगावले. तसेच वैभवने हैदराबादचा नियमित कर्णधार पॅट कमिन्स याचं पहिल्याच बॉलवर सिक्स ठोकून स्वागत केलं.
वैभवने 15 चेंडूत 7 षटकार आणि 1 चौकारासह 333.33 च्या स्ट्राईक रेटने हे अर्धशतक पूर्ण केलं. वैभवने यासह मोठा वर्ल्ड रेकॉर्ड केला. वैभव टी 20 क्रिकेटमध्ये चेंडूबाबत वेगवान 1 हजार धावा करणारा पहिला फलंदाज ठरला. वैभवने यासह मिचेल ओवन याचा वर्ल्ड रेकॉर्ड ब्रेक केला. तसेच वैभव वेगवान 1 हजार टी 20 धावा करणारा सर्वात युवा फलंदाजही ठरला.
वैभवने मिचेल ओवन याचा टी 20 क्रिकेटमध्ये वेगवान 1 हजार धावा करण्याचा विश्व विक्रम मोडीत काढला. वैभवने मिचेलच्या तुलनेत 60 बॉलआधी 1 हजार धावा पूर्ण केल्या. वैभवने 473 चेंडूत 1 हजार टी 20 धावा केल्या. तर मिचेल ओवन याला 1 हजार धावांपर्यंत पोहचण्यासाठी 533 चेंडूंचा सामना करावा लागला होता.
वैभव सूर्यवंशी : 473 बॉल
मिचेल ओवन : 533 बॉल
अँड्रयू सायमंड्स : 558 बॉल
वैभवचा अर्धशतका तडाखा, वर्ल्ड रेकॉर्ड उद्धवस्त
तसेच वैभवने 26 व्या डावात 1 हजार टी 20 धावा पूर्ण केल्या. वैभव यासह डावांबाबत वेगवान 1 हजार टी 20 धावा पूर्ण करणारा दुसरा भारतीय फलंदाज ठरला. तर भारताकडून डावांबाबत वेगवान 1 हजार धावा करण्याचा विक्रम हा देवदत पडीक्कल याच्या नावावर आहे. देवदत्तने 25 डावांत 1 हजार टी 20 धावा केल्या होत्या.
