इंग्लंडच्या या वर्ल्ड कप संघात अनुभव आणि तरुण रक्ताचा उत्तम संगम पाहायला मिळत आहे. १८ वर्षांची फिरकीपटू टिली कोर्टीन-कोलमॅन हिला पहिल्यांदाच वर्ल्ड कप संघात स्थान मिळाले आहे. कोर्टीन-कोलमॅन गेल्या काही सीझनपासून इंग्लंडमधील सर्वोत्कृष्ट युवा खेळाडूंपैकी एक ठरली आहे. वयाच्या १६ व्या वर्षीच तिने देशांतर्गत क्रिकेटमध्ये आपला ठसा उमटवला होता. ‘द हंड्रेड’च्या अलीकडच्या सीझनमध्ये तिने ९ सामन्यांत ११ विकेट्स घेतल्या आणि तिचा इकॉनॉमी रेट ५.७५ इतका उत्कृष्ट राहिला. सदर्न ब्रेव्हला फायनलपर्यंत पोहोचवण्यात तिने महत्त्वाची भूमिका बजावली होती. यंदाच्या देशांतर्गत एकदिवसीय (ODI) सामन्यांमध्येही तिने आपला फॉर्म कायम राखला असून ७ डावात १० बळी मिळवले आहेत.
याशिवाय इस्सी वोंग आणि लॉरेन फाईलर यादेखील पहिल्यांदाच T20 वर्ल्ड कप संघाचा भाग बनल्या आहेत. तर दुसरीकडे, अनुभवी फलंदाज डॅनी व्याट-हॉज आपला आठवा T20 वर्ल्ड कप खेळण्यासाठी सज्ज झाली असून, ती संघासाठी मोठी ताकद ठरू शकते.
चार्ली डीनची संघाच्या उपकर्णधारपदी निवड करण्यात आली आहे, तर वेगवान गोलंदाज लॉरेन बेल गोलंदाजीच्या आक्रमणाचे नेतृत्व करेल. संघात अनेक शानदार अष्टपैलू खेळाडू आहेत, जे कोणत्याही परिस्थितीत सामन्याचे पारडे फिरवू शकतात. संघाच्या मुख्य प्रशिक्षक शार्लोट एडवर्ड्स आहेत, ज्यांच्या मार्गदर्शनाखाली २००९ मध्ये इंग्लंडने महिला T20 वर्ल्ड कप जिंकला होता.
