தமிழகச் சட்டமன்றத் தேர்தல் முடிவுகளின்படி 108 இடங்களைக் கைப்பற்றியுள்ள தமிழக வெற்றிக் கழகம், அறுதிப் பெரும்பான்மையைப் பெறுவதற்காகப் பல்வேறு கட்சிகளுடன் பேச்சுவார்த்தை நடத்தி வருகிறது. குறிப்பாகக் காங்கிரஸ், இடதுசாரிகள், விடுதலைச் சிறுத்தைகள் மற்றும் பாமக ஆகிய கட்சிகளின் ஆதரவுடன் கூட்டணி ஆட்சியை அமைக்க விஜய் தரப்பு முயன்று வரும் வேளையில், அதிமுக-வின் ஆதரவைப் பெறுவது குறித்த புதிய விவாதங்கள் எழுந்துள்ளன. திரைமறைவில் இதற்கான பேச்சுவார்த்தைகள் மிகவும் தீவிரமாக நடைபெற்று வருவதாக அரசியல் வட்டாரங்கள் தெரிவிக்கின்றன.

பாஜக-வுடனான கூட்டணியால் கடந்த சில தேர்தல்களில் தொடர் தோல்விகளைச் சந்தித்த அதிமுக, தற்போது ஒரு புதிய அரசியல் பாதையைத் தேர்ந்தெடுக்க விரும்புகிறது. பாஜக உறவை முழுமையாக முறித்துக் கொண்டு தவெக-வுடன் இணைவது கட்சியின் எதிர்காலத்திற்கு வலுசேர்க்கும் என அந்த அணியின் நிர்வாகிகள் கருதுகின்றனர். குறிப்பாக, மீண்டும் ஒரு தேர்தலைச் சந்தித்து நிதி நெருக்கடியில் சிக்கிக் கொள்வதை விட, மக்கள் தீர்ப்புக்கு மதிப்பளித்து தவெக-விற்கு ஆதரவு அளிப்பதே சிறந்தது என்று அதிமுக எம்.எல்.ஏ-க்கள் எடப்பாடி பழனிசாமியிடம் வலியுறுத்தி வருகின்றனர்.

காங்கிரஸ் கட்சியும் திமுக-வுடனான முந்தைய முரண்பாடுகளைக் கருத்தில் கொண்டு, விஜய்க்கு ஆதரவு அளிப்பதன் மூலம் எதிர்காலத்தில் ஒரு மாற்றுச் சக்தியாக உருவெடுக்கத் திட்டமிட்டுள்ளது. அதேசமயம் அதிமுக தரப்பிலிருந்து தவெக-விடம் அதிகாரப்பூர்வமான அழைப்பு இன்னும் வரவில்லை என்று கூறப்பட்டாலும், பேச்சுவார்த்தைக்கான சமிக்ஞைகள் கிடைத்தால் அதனை ஏற்று ஆதரவு வழங்கத் தயாராகவே இருப்பதாக முன்னணி நிர்வாகிகள் தெரிவித்துள்ளனர்.

இந்தக் கூட்டணி மாற்றம் என்பது தொண்டர்களுக்கு ஒரு உற்சாக டானிக்காக அமையும் என்பது அதிமுக-வின் கணிப்பாக உள்ளது. திமுக-விற்கு மாற்றாகத் தவெக தலைமையில் ஒரு புதிய அணியை உருவாக்குவதே தற்போதைய அரசியல் சூழலில் பலரது விருப்பமாக உள்ளது. எடப்பாடி பழனிசாமி தற்போது சென்னையில் இருக்கும் தனது கட்சியின் முக்கிய நிர்வாகிகளுடன் இது குறித்து ஆலோசித்து விரைவில் ஒரு உறுதியான முடிவை அறிவிப்பார் என எதிர்பார்க்கப்படுகிறது. இதனால் காங்கிரஸ்-இடதுசாரி ஆதரவா அல்லது அதிமுக-வின் ஆதரவா என்ற எதிர்பார்ப்புகளுக்கு இடையில் விஜய்யின் அடுத்தகட்ட நகர்வு தமிழக அரசியலில் பெரும் தாக்கத்தை ஏற்படுத்தும்.