चेन्नई. तामिळनाडूमध्ये सरकार स्थापनेबाबतचा राजकीय पेच तीव्र झाला असला तरी सत्तेचे चित्र अद्याप स्पष्ट झालेले नाही. TVK चे प्रमुख विजय यांनी पुन्हा एकदा राजभवन गाठून राज्यपाल राजेंद्र विश्वनाथ आर्लेकर यांची भेट घेतली. मात्र, या बैठकीनंतरही सरकार स्थापनेबाबत अनिश्चितता कायम आहे.

सूत्रांच्या माहितीनुसार, राज्यपालांनी स्पष्ट संकेत दिले आहेत की केवळ सर्वात मोठा पक्ष असल्याच्या आधारावर सरकार स्थापनेला परवानगी दिली जाऊ शकत नाही. 234 सदस्यीय विधानसभेत बहुमत सिद्ध करण्यासाठी आवश्यक असलेल्या 118 आमदारांचा पाठिंबा दर्शवणे बंधनकारक असेल, असे त्यांनी स्पष्ट केले आहे.

TVK बनला सर्वात मोठा पक्ष, पण बहुमतापासून दूर-
23 एप्रिल रोजी झालेल्या विधानसभा निवडणुकीत TVK ने चमकदार कामगिरी केली आणि 108 जागा जिंकून सर्वात मोठ्या पक्षाचा दर्जा प्राप्त केला. मात्र, विजय दोन जागांवर विजयी झाले असून नियमानुसार त्यांना एक जागा सोडावी लागणार आहे. अशा स्थितीत पक्षाची खरी संख्या 107 राहील.

काँग्रेसचा पाठिंबा, तरीही आकडेवारी अपूर्ण-
सरकार स्थापनेच्या प्रयत्नांदरम्यान, काँग्रेसने द्रमुक आघाडीपासून फारकत घेण्याचा आणि टीव्हीकेला पाठिंबा देण्याचा निर्णय घेतला. काँग्रेसचे पाच आमदार विजयच्या समर्थनार्थ पुढे आले आणि TVK ची संख्या 112 वर नेली. परंतु पक्ष अजूनही 118 च्या जादूई बहुमताच्या आकड्यापासून सहा जागा कमी आहे.
त्यामुळेच राज्यपालांनी सध्या शपथविधीबाबत कोणताही निर्णय घेतलेला नाही.

विजयने दावा मांडला, पण राजभवनाने स्पष्ट बहुमत मागितले-
बुधवारी विजय यांनी काँग्रेसच्या पाठिंब्याचे पत्र घेऊन सरकार स्थापनेचा दावा केला होता. दुसऱ्या दिवशी ते पुन्हा राजभवनात पोहोचले. या काळात पाठिंबा आणि सरकार स्थापनेच्या गणितावर चर्चा झाल्याचे मानले जाते.

राजभवनकडून अद्याप कोणतेही अधिकृत निवेदन जारी करण्यात आलेले नसले तरी, राज्यपालांनी केवळ समर्थनाची पत्रे किंवा तोंडी दावे पुरेसे नसल्याचं स्पष्ट केल्याचे सूत्रांचे म्हणणे आहे. स्थिर सरकारसाठी 118 आमदारांचा स्पष्ट पाठिंबा आवश्यक आहे.

TVK चा दावा – प्रक्रिया लवकरच पुढे जाईल –
दरम्यान, TVK नेते व्हीएस बाबू म्हणाले की सरकार स्थापनेची प्रक्रिया लवकरच पुढे जाऊ शकते. मात्र, केंद्र सरकारच्या दबावासंबंधीच्या प्रश्नांवर भाष्य करण्यास त्यांनी नकार दिला.

तामिळनाडूच्या राजकारणात सुरू असलेला हा सस्पेन्स आता येत्या काही दिवसांत नवे वळण घेऊ शकतो, कारण सर्वांच्या नजरा आता बहुमताच्या आकड्यांवर आणि राजभवनाच्या पुढच्या टप्प्यावर खिळल्या आहेत.