Pune Accident News : पुणे जिल्ह्यातील खेड शिवापूर टोलजवळ भीषण अपघात झाल्याची घटना घडली आहे. गॅस टँकरच्या धडकेत दुचाकीवरील दाम्पत्याचा जागीच मृत्यू झाला आहे. या घटनेनंतर संतप्त नागरिकांकडून टँकरची तोडफोड करण्यात आली आहे. पुणे-बंगळुरू राष्ट्रीय महामार्गावरील खेड शिवापूर टोल नाक्याजवळ शुक्रवारी दुपारी भीषण अपघात झाला.
गॅस टँकरने दुचाकीला जोरदार धडक दिल्याने दुचाकीवरील पती-पत्नीचा जागीच मृत्यू झाला. या घटनेनंतर काही काळ महामार्गावरील वाहतूक विस्कळीत झाली होती. मिळालेल्या माहितीनुसार, वारजे माळवाडी येथील राजेंद्र बबन मोरे (वय 55) आणि सविता राजेंद्र मोरे (वय 42) हे दुचाकी क्रमांक एमएच 12 एफएच 4696 वरून साताऱ्याकडे जात होते. खेड शिवापूर टोल नाक्याच्या मागील सातारा लेनवर त्यांच्या दुचाकीला गॅस टँकर क्रमांक एपी 03 टीई 5759 ने जोरदार धडक दिली. धडक इतकी भीषण होती की दोघेही टँकरखाली ओढले गेले आणि त्यांचा घटनास्थळीच मृत्यू झाला. अपघातानंतर दुचाकी रस्त्याच्या कडेला दूरपर्यंत फेकली गेली होती.
प्रत्यक्षदर्शींनी दिलेल्या माहितीनुसार, टँकर आणि दुचाकी दोन्ही वेगात होती. टँकर चालकाचे वाहनावरील नियंत्रण सुटल्याने हा अपघात झाल्याचा प्राथमिक अंदाज व्यक्त केला जात आहे. घटनेनंतर स्थानिक नागरिकांनी तातडीने मदतीसाठी धाव घेत पोलिसांना माहिती दिली. मात्र, गंभीर दुखापतींमुळे दाम्पत्याचा जागीच मृत्यू झाल्याचे स्पष्ट झाले. अपघातानंतर परिसरात मोठी गर्दी झाली होती. संतप्त नागरिकांनी गॅस टँकरची तोडफोड केल्याची माहिती समोर आली असून काही काळ तणावाचे वातावरण निर्माण झाले होते. परिस्थिती नियंत्रणात आणण्यासाठी पोलिसांनी तातडीने घटनास्थळी धाव घेतली. वाहतूक सुरळीत करत पंचनामा करण्यात आला. मृतदेह शवविच्छेदनासाठी रुग्णालयात पाठवण्यात आले आहेत. टँकर चालक राज किशन बी. (रा. तिरुपुरम) याला पोलिसांनी ताब्यात घेतले असून पुढील तपास सुरू आहे.
