அமெரிக்கா உடனான பலவீனமான போர்நிறுத்த முயற்சிகளுக்கு மத்தியில், பதற்றத்தை அதிகரிக்கும் விதமாக, மற்றொரு ராணுவத் தாக்குதல் நடத்தப்பட்டால், யுரேனியத்தை 90 சதவீதம் வரை தூய்மையாக்கி (இது ஆயுதத் தரம் என கருதப்படும் நிலை) செறிவூட்டுவோம் என ஈரான் எச்சரித்துள்ளது.
இந்த திட்டம் நாடாளுமன்றத்திற்குள் விவாதிக்கப்பட்டு வருவதாகவும், டெஹ்ரான் மீண்டும் தாக்குதலுக்கு உள்ளானால், இது செயல்படுத்தப்படலாம் என்றும் ஈரானிய நாடாளுமன்ற செய்தித் தொடர்பாளர் இப்ராஹிம் ரெசாய் கூறியுள்ளார். பல மாதங்களாக நீடித்துவரும் ராணுவ மோதல்கள் மற்றும் தோல்வியடைந்த அணுசக்தி பேச்சுவார்த்தைகளைத் தொடர்ந்து, ஈரானின் அதிக செறிவூட்டப்பட்ட யுரேனியக் கையிருப்பு மற்றும் வாஷிங்டனுடனான முடங்கியுள்ள ராஜதந்திரப் பேச்சுவார்த்தைகளின் எதிர்காலம் குறித்த கவலைகள் தொடர்ந்து அதிகரித்து வரும் நிலையில், அவரது இந்த கருத்துக்கள் வெளியாகியுள்ளன.
மீண்டும் தாக்கப்பட்டால், யுரேனியத்தை 90 சதவீத தூய்மைக்கு செறிவூட்டுவது குறித்து டெஹ்ரான் பரிசீலிக்கக்கூடும் என்று ஈரானின் நாடாளுமன்ற தேசிய பாதுகாப்பு மற்றும் வெளியுறவுக் கொள்கை ஆணையத்தின் செய்தித் தொடர்பாளர் இப்ராஹிம் ரெசாயி கூறினார்.
தனது எக்ஸ் தளத்தில் பதிவிட்ட ரெசாயி, இந்த நடவடிக்கை ஈரானின் சாத்தியமான பதில்களில் ஒன்றாக நீடிக்கிறது என்றும், இது நாடாளுமன்றத்தில் பரிசீலிக்கப்படும் என்றும் கூறியுள்ளார். 90 சதவீதம் வரை செறிவூட்டப்பட்ட யுரேனியம், ஆயுதத் தரம் வாய்ந்த பொருளாக பரவலாக கருதப்படுவதோடு, ஈரானின் அணுசக்தித் திட்டத்தில் ஒரு பெரிய தீவிரமயமாக்கலையும் இது குறிக்கிறது.
கடந்த ஆண்டு நடைபெற்ற 12 நாள் மோதலின்போது, அமெரிக்காவும் இஸ்ரேலும் இணைந்து நடத்திய தாக்குதல்களில், ஈரானின் அணுசக்தி உள்கட்டமைப்பு "முற்றிலுமாக அழிக்கப்பட்டுவிட்டது" என்று அமெரிக்க அதிபர் டொனல்ட் ட்ரம்ப் கூறிய போதிலும், இந்த எச்சரிக்கை விடுக்கப்பட்டுள்ளது.
அமெரிக்காவிற்கும் ஈரானுக்கும் இடையிலான தற்போதைய போர் நிறுத்தம் 'உயிருக்கு ஆபத்தான நிலையில்' உள்ளது என்று நேற்று ட்ரம்ப் கூறினார். இது, நடைபெற்று வரும் ராஜதந்திர முயற்சிகளின் பலவீனமான நிலையை சுட்டிக்காட்டுகிறது.
சமீபத்திய தாக்குதல்கள், ஈரானின் அணுசக்தித் திறன்களை கடுமையாகச் சேதப்படுத்தியதாக அமெரிக்கா கூறினாலும், ஆயுதத் தர நிலையை எட்டுவதற்கு சற்றே குறைவான தொழில்நுட்பப் படியில் உள்ள, 60 சதவித தூய்மைக்கு செறிவூட்டப்பட்ட ஏறத்தாழ 400 கிலோகிராம் யுரேனியம் குறித்த நிச்சயமற்ற தன்மை நீடிக்கிறது.
ஈரானிடம் உள்ள அணு ஆயுதக் கிடங்கு அழிக்கப்பட்டாலோ அல்லது நாட்டிலிருந்து அகற்றப்பட்டாலோ அன்றி, அந்நாட்டின் அணு ஆயுதத் திட்டத்தை அர்த்தமுள்ள வகையில் சீர்குலைக்க முடியாது என்று அமெரிக்க உளவுத்துறை மதிப்பீடுகள் தெரிவிப்பதாக கூறப்படுகிறது.
பிப்ரவரி மாத இறுதியில் வெடித்த போரை முடிவுக்கு கொண்டுவருவதை நோக்கமாகக் கொண்ட பேச்சுவார்த்தைகளில், அணுசக்தி பிரச்னை மிகப்பெரிய தடையாக உருவெடுத்துள்ளது. அணுசக்தி தொடர்பான பேச்சுவார்த்தைகள் பிற்காலத்தில் நடைபெற வேண்டும் என்று ஈரான் வலியுறுத்துகிறது. அதே நேரத்தில், டெஹ்ரான் முதலில் தனது அதிக செறிவூட்டப்பட்ட யுரேனியம் கையிருப்பை வெளிநாடுகளுக்கு மாற்ற வேண்டும் என்றும், உள்நாட்டு செறிவூட்டல் நடவடிக்கைகளை கைவிட வேண்டும் என்றும் அமெரிக்கா வலியுறுத்துகிறது.
இரு தரப்பினருக்கும் இடையிலான ராஜதந்திர வழிமுறைகள் மேலும் மேலும் மோசமடைந்து வருவதால், இந்த முட்டுக்கட்டையானது பிராந்தியத்தில் மற்றொரு பதற்றம் அதிகரிக்குமோ என்ற புதிய அச்சத்தை ஏற்படுத்தியுள்ளது.
