पूर्व डोमिनिकन रिपब्लिकमधील ला रोमाना आंतरराष्ट्रीय विमानतळावर रविवारी 7 जून रोजी एक भीषण विमान अपघात घडला. टेक ऑफ करताना एक खाजगी विमान अचानक धावपट्टीवरच क्रॅश झाले. या अपघातानंतर विमानाला मोठी आग लागली आणि अवघ्या काही वेळातच संपूर्ण विमान जळून राख झाले. राष्ट्रीय विमान वाहतूक प्राधिकरणाने दिलेल्या माहितीनुसार, या दुर्घटनेत विमानातील पायलट आणि को-पायलट या दोघांचाही जागीच मृत्यू झाला आहे. सुदैवाने, या विमानात अन्य कोणताही प्रवासी नव्हता. अपघातग्रस्त विमान हे ‘गल्फस्ट्रीम जी200’ जेट असल्याचे समोर आले आहे.

या थरारक अपघाताचा एक व्हिडिओ सध्या सोशल मीडियावर प्रचंड व्हायरल होत आहे. या व्हिडिओमध्ये दिसते की, विमान टेकऑफ करत असताना त्याची चाके धावपट्टीला लागताच वैमानिकाचे विमानावरील नियंत्रण सुटते. उड्डाण घेताना विमानाचा वेग अचानक वाढतो, ते धावपट्टीवर अनेकदा उसळते आणि काही सेकंदांतच त्याचे आगीच्या एका मोठ्या गोळ्यात रूपांतर होते.

डोमिनिकन नागरी विमान वाहतूक संस्थेने जारी केलेल्या निवेदनानुसार, या विमानाने ला रोमानाच्या नैऋत्येस सुमारे 16 नॉटिकल मैल अंतरावर असताना आपत्कालीन सूचना दिली होती, मात्र विमानतळावरून उड्डाण करण्याच्या प्रयत्नात असतानाच ते कोसळले. हे विमान आधी पोर्तो रिकोहून डोमिनिकन रिपब्लिकमध्ये आले होते. येथे विमानात इंधन भरण्यात आले आणि त्यानंतर ते अमेरिकेतील ऑस्टिनच्या दिशेने जाण्यासाठी निघत असतानाच हा अपघात घडला. विमानाचा हा भीषण अपघात नेमका कोणत्या कारणामुळे झाला, याचा शोध घेण्यासाठी नागरी विमान वाहतूक प्राधिकरणाकडून कसून चौकशी आणि तपास सुरू करण्यात आला आहे.