கிரிக்கெட் வரலாற்றில் அடுக்கடுக்கான பல்வேறு புதிய சாதனைகள் தினமும் உருவாக்கப்பட்டு, பின்னர் அவை முறியடிக்கப்படுவது மிகவும் வழக்கமான ஒன்றாகும். ஆனால் ஒரு சில அரிய சாதனைகள் மட்டுமே காலத்தை கடந்து இன்றளவும் அசைக்க முடியாத இமாலய வரலாற்றுப் புதையலாக நிலைத்து நிற்கின்றன. அந்த வகையில், 130 ஆண்டுகளுக்கும் மேலாக சர்வதேச கிரிக்கெட் அரங்கில் எந்தவொரு பந்துவீச்சாளராலும் நெருங்கக் கூட முடியாத ஒரு அரிய உலக சாதனை இங்கிலாந்தின் முன்னாள் வேகப்பந்து வீச்சாளர் ஜார்ஜ் லோஹ்மான் பெயரில் இன்று வரை கம்பீரமாக நிலைத்து நிற்கிறது.

கடந்த 1896-ம் ஆண்டு இங்கிலாந்து மற்றும் தென் ஆப்பிரிக்கா அணிகளுக்கு இடையிலான விறுவிறுப்பான டெஸ்ட் தொடரின்போது தான் இந்த வரலாற்றுச் சிறப்புமிக்க அரிய சாதனை நிகழ்த்தப்பட்டது. அந்தத் தொடரின் முதல் டெஸ்ட் போட்டியின் இரண்டாவது இன்னிங்ஸில் தென் ஆப்பிரிக்கா அணிக்கு எதிராக மிகக் கொடூரமாகப் பந்துவீசிய ஜார்ஜ் லோஹ்மான், வெறும் 9.4 ஓவர்கள் மட்டுமே வீசி, அதில் 6 ஓவர்களை மெய்டனாக மாற்றி, வெறும் 7 ரன்களை மட்டுமே விட்டுக்கொடுத்து 8 விக்கெட்டுகளை  கைப்பற்றி அசத்தினார். டெஸ்ட் கிரிக்கெட் வரலாற்றில் 8 விக்கெட்டுகளை வீழ்த்திய பந்துவீச்சாளர்களில் மிகக் குறைந்த ரன்களை விட்டுக்கொடுத்தவர் என்ற அரிய பெருமை இன்றளவும் அவரிடமே உள்ளது.

அவரது அசாத்திய பந்துவீச்சு சாதனை அத்துடன் முடிவடைந்து விடாமல், அதே தொடரின் இரண்டாவது டெஸ்ட் போட்டியின் இரண்டாவது இன்னிங்ஸிலும் வெறும் 28 ரன்களை மட்டுமே விட்டுக்கொடுத்து 9 விக்கெட்டுகளை வீழ்த்தி ஒட்டுமொத்த கிரிக்கெட் உலகையும் தன்பக்கம் திரும்பிப் பார்க்க வைத்தார். தனது சர்வதேச கிரிக்கெட் வாழ்க்கையில் வெறும் 18 டெஸ்ட் போட்டிகளில் மட்டுமே விளையாடி 112 விக்கெட்டுகளைக் கைப்பற்றியுள்ள அவர், தனது 16-வது டெஸ்ட் போட்டியிலேயே 100 விக்கெட்டுகள் என்ற மைல்கல்லை எட்டி அக்காலத்தில் அதிவேகமாக 100 விக்கெட்டுகளை வீழ்த்திய பந்துவீச்சாளர் என்ற சாதனையையும் படைத்திருந்தார். மிகவும் பிரகாசமான எதிர்காலம் கொண்டிருந்த ஜார்ஜ் லோஹ்மான் உடல்நலக் குறைவு காரணமாக வெறும் 36 வயதிலேயே காலமானாலும், அவரது இந்த சாதனைகள் கிரிக்கெட் வரலாறு இருக்கும் வரை அழியாமல் நிலைத்து நிற்கும்.