महिला टी२० वर्ल्ड कप २०२६ स्पर्धेत भारतीय महिला संघाने नेदरलँड्स महिला संघाविरुद्ध बुधवारी ९५ धावांनी दणदणीत विजय मिळवला. भारताचा या स्पर्धेच्या इतिहासातील सर्वात मोठा विजय ठरला. पण असे असले तरी हा सामना सुरू असताना भारतीय संघाला मोठा धक्का बसला आहे. भारताची प्रमुख गोलंदाज श्रेयंका पाटीलला गंभीर दुखापत झाली आहे.

झाले असे की भारतीय संघाने दिलेल्या २१० धावांच्या लक्ष्याचा पाठलाग करण्यासाठी नेदरलँड्स संघ उतरला होता. त्यांनी सलामीची फलंदाज हिदर सीगर्सची विकेट ५ व्याच षटकात २१ धावांवर गमावली होती. त्यानंतर ६ व्या षटकात गोलंदाजी करण्यासाठी श्रेयंका पाटील आली.

तिने पहिला चेंडू फिबी मोकनबोरला टाकला. फिबीने खेळलल्या शॉटवर श्रेयंका चेंडू अडवायला गेली, पण चूकीच्या पद्धतीने पडली. तिचा पायाचा घोटा मुरगळला. त्यामुळे तिला प्रचंड वेदना झाल्याने ती तशीच मैदानावर बसली. त्यामुळे भारताच्या इतर खेळाडू तिच्या भोवती जमा झाल्या. लगेचच फिजिओही मैदानात आले.

काहीवेळ तिच्यावर प्राथमिक उपचार केल्यानंतर मात्र मैदानात स्ट्रेचर मागवण्यात आले. श्रेयंकाला पायावर उभंही राहता येत नव्हतं. तिला नंतर स्ट्रेचरवरून माघारी नेण्यात आलं. त्यामुळे उर्वरित ६ व्या षटकातील गोलंदाजी शफाली वर्माने केली.