ठरलेलं लग्न एक महिन्यावर आलेलं, भावी पत्नीचा वाढदिवस अवघा एका दिवस, बर्थडे सेलिब्रेशन करण्यासाठी कुटुंबीय आणि मित्रांसोबत लोहगडावर गेलेल्या केतनच्या आयुष्यातील ती ट्रीप शेवटची ठरेल असं कोणालाच वाटलं नव्हतं. लोहदडावर फिरता फिरता एका बेसावध क्षणी बॅलन्स गेला , पाय घसरला आणि क्षणार्धात 26 वर्षांचा केतन डायरेक्ट 350 फूट खोल दरीत कोसळला. एका क्षणात होत्याचं नव्हतं झालं. खाली कोसळून गंभीर जखमी झालेल्या केतनचा दुर्दैवी मृत्यू झाल्याने त्याचे कुटुंबिय, मित्र यांच्यावर दु:खाचा डोंगर कोसळला आहे. त्याच्या होणाऱ्या पत्नीची अवस्था तर रडून रडून अगदी केविलवाणी झाली. या घटनेनंतर, केवळ केतनचा्या कुटुंबातच नव्हे, तर संपूर्ण व्यावसायिक आणि सामाजिक क्षेत्रातही शोकाची लाट पसरली आहे.

मिळालेल्या माहितीनुसार, केतन अग्रवाल हा प्रसिद्ध बिल्डर विशाल अग्रवाल यांचा मुलगा असून तो कुटुंबीय आणि मित्रांसोबत लोहगड किल्ल्यावर फिरण्यासाठी गेला होता. सगळेजण फिरत होते, किल्ला पहात होते, मात्र तेवढ्यात अचानक केतनचा पाय घसरला आणि तो सुमारे 350 फूट खोल दरीत कोसळला. ही दुर्घटना इतकी भीषण होती की त्याला सावरण्याची कोणतीही संधी मिळाली नाही आणि त्याचा जागीच मृत्यू झाला.

या दुर्दैवी घटनेची माहिती मिळताच लोणावळा ग्रामीण पोलीस, ‘शिवदुर्ग मित्र लोणावळा’ आणि ‘मावळ वन्यजीव संरक्षण संस्था’ यांचे पथक तातडीने घटनास्थळी दाखल झालं. खडतर भूभागात राबवलेल्या आव्हानात्मक बचावकार्यानंतर केतनचा मृतदेह दरीतून बाहेर काढण्यात आला. त्यानंतर त्याला रुग्णालयात नेण्यात आले, जिथे डॉक्टरांनी त्याची तपासणी केली. मात्र उपचार सुरू होण्यापूर्वीच त्याला मृत घोषित करण्यात आलं.

19 जूनला होता भावी पत्नीचा वाढदिवस, तर महिन्याभरावर आलं होतं लग्न

ही शोकांतिका अग्रावल कुटुंबासाठी अधिकच वेदनादायी आहे, कारण केतनच्या आयुष्यात आनंदाचा एक नवीन लवकरच अध्याय सुरू होणार होता. पुढल्या महिन्यात त्याचा विवाह होणार होता. तर 19 जून रोजी त्याच्या होणाऱ्या पत्नीचा वाढदिवस असतो आणि त्यासाठी त्याने विशेष तयारी केली होती. महाबळेश्वरमध्ये तिचा वाढदिवस मस्तपैकी सेलिब्रेट करण्याचा त्याचा प्लान होता, त्यासाठी त्याने जय्यत तयारीही केली होती, मात्र त्याआधीच काळाने त्याच्यावर घाला घातला.

कोट्यवधींचा पॅलेस बूक, पाहुण्यांसाठी विमानाचीही व्यवस्था

इतकंच नाही, तर पुढील महिन्यात जयपूरमध्ये केतनचं लग्न होणार होत, त्यासाठी भव्य सोहळ्याचे आयोजन करण्यात आलं होतं. या कार्यक्रमासाठी कुटुंबीयांनी जय्यत तयारी केली होती. कोट्यवधी रुपये खर्चून या लग्नासाठी जयपूरमधील एक आलिशान पॅलेस बूक करण्यात आला होता. पाहुण्यांच्या येण्याजाण्यासाठी दोन विशेष विमानांचीही व्यवस्था करण्यात आली होती. मात्र, लग्नाच्या तयारी आणि उत्सवाच्या वातावरणादरम्यानच, घडलेल्या या अत्यंत दुर्दैवी अपघताामुळे संपूर्ण कुटुंब प्रचंड धक्क्यात आहे.

जिथे सुरू होती लग्नाची तयारी, तिथेच आता शोककळा

केतन अग्रवाल हा बांधकाम क्षेत्रातील नामांकित व्यावसायिक विशाल अग्रवाल यांचा सुपुत्र होता. त्याच्या अकाली निधनामुळे त्याचे कुटुंबीय, नातेवाईक आणि मित्रपरिवार अत्यंत शोकाकुल झाला आहे. ज्या घरात लग्नाची तयारी सुरू होती, तिथेच आता शोककळा पसरली आहे.

या घटनेसंदर्भात लोणावळा ग्रामीण पोलीस ठाण्यात अपघाती मृत्यूची नोंद करण्यात आली. पोलीस या घटनेचा संपूर्ण घटनाक्रम तपासत आहेत. हा अपघात गुरुवारी सकाळी 10 च्या सुमारास घडला. घटनेनंतर स्थानिक प्रशासन, पोलीस आणि बचाव पथकांनी तातडीने मदत व बचाव कार्य सुरू केले. पुणे आणि मुंबईतील पर्यटकांमध्ये लोहगड किल्ला हे अत्यंत लोकप्रिय पर्यटन स्थळ मानले जाते. पावसाळ्यात येथे पर्यटकांची मोठी गर्दी असते. मात्र नुकत्याच घडलेल्या या दुर्दैवी घटनेमुळे डोंगराळ आणि किल्ले असलेल्या भागांत काळजी घेण्याच्या आवश्यकता पुन्हा अधोरेखित होते.