आयर्लंड विरुद्ध टीम इंडिया यांच्यातील दुसऱ्या आणि अंतिम सामन्याचं आयोजन हे बेलफास्टमधील सिव्हील सर्व्हीस क्रिकेट क्लब इथे करण्यात आलं आहे. या सामन्याला भारतीय वेळेनुसार संध्याकाळी 6 वाजता सुरुवात होणार आहे. त्याआधी 5 वाजून 30 मिनिटांनी टॉस झाला. भारताच्या बाजूने नाणेफेकीचा कौल लागला. कर्णधार श्रेयस अय्यर याने फिल्डिंग करण्याचा निर्णय घेतला आहे. भारतीय गोलंदाज पहिल्या सामन्यात आयर्लंडला कमी धावसंख्येत रोखण्यात अपयशी ठरले होते. त्यामुळे आता दुसऱ्या आणि अंतिम सामन्यात भारतीय गोलंदाज आपली चूक सुधारणार का? हे पाहणं महत्त्वाचं ठरणार आहे.
यजमान आयर्लंड 2 सामन्यांच्या मालिकेत 1-0 ने आघाडीवर आहे. टीम इंडियाला मालिका बरोबरीत राखण्यासाठी कोणत्याही स्थितीत हा सामना जिंकावा लागणार आहे. टीम इंडियाकडून सलग दुसऱ्या सामन्यातही युवा फलंदाज वैभव सूर्यवंशी याला संधी दिली नाही. त्यामुळे चाहत्यांचा हिरमोड झाला आहे. त्यामुळे वैभवला आता आंतरराष्ट्रीय पदार्पणासाठी इंग्लंड दौऱ्यातील टी 20I मालिकेपर्यंत प्रतिक्षा करावी लागणार आहे.
दरम्यान टीम इंडियाने आयर्लंड विरुद्धच्या दुसऱ्या सामन्यासाठी प्लेइंग ईलेव्हनमध्ये 2 बदल केले आहेत. वेगवान गोलंदाज प्रसिध कृष्णा आणि ऑलराउंडर वॉशिंग्टन सुंदर या दोघांना डच्चू देण्यात आला आहे. या दोघांनीही पहिल्या सामन्यात निराशा केली होती. त्यामुळे दोघांना बाहेर करण्यात आलं आहे. तर अंतिम सामन्यातून टीम इंडियाकडून दोघांचं पदार्पण झालं आहे. प्रिन्स यादव आणि मुंबईकर सूर्यांश शेडगे या दोघांना पदार्पणाची संधी देण्यात आली आहे. त्यामुळे आता डेब्युटंट खेळाडू आपली छाप सोडण्यात यशस्वी ठरणार का? हे पाहणं महत्त्वाचं ठरणार आहे.
कॅप नंबर 120 आणि 121
आयर्लंड प्लेइंग ईलेव्हन : टीम टेक्टर, रॉस अडायर, हॅरी टेक्टर, लॉर्कन टकर (कर्णधार आणि विकेटकीपर), बेंजामिन कॅलिट्झ, गॅरेथ डेलेनी, जॉर्ज डॉकरेल, लियाम मॅककार्थी, मॅथ्यू हम्फ्रे, जय मुंद्रा आणि मॅथ्यू हॉलर्ड.
टीम इंडिया प्लेइंग ईलेव्हन : अभिषेक शर्मा, संजू सॅमसन (विकेटकीपर), इशान किशन, श्रेयस अय्यर (कर्णधार), तिलक वर्मा, शिवम दुबे, सूर्यांश शेडगे, अक्षर पटेल, हर्षित राणा, अर्शदीप सिंग आणि प्रिन्स यादव.
