सध्या केवळ एक फूट उंची : 23 मे रोजी शिवलिंग होते 7 फूट

वृत्तसंस्था/ अमरनाथ, श्रीनगर

अमरनाथ गुहेमध्ये तयार झालेले पवित्र शिवलिंग आकाराने एक फूट झाले आहे. सोमवारी एक फूट उंचीच्या बाबा बर्फानी यांचा एक फोटो समोर आला. 23 मे रोजी बीएसएफच्या जवानांनी प्रसिद्ध केलेल्या पहिल्या फोटोमध्ये शिवलिंगाची उंची अंदाजे 7 फूट होती. त्यानंतर 29 जून रोजी पहिल्या पूजेच्या दिवशीही बर्फाच्या शिवलिंगाची उंची 5 फुटांपेक्षा जास्त होती. मात्र, 6 जुलै रोजी प्रसिद्ध झालेल्या फोटोमध्ये ते अंदाजे 90 टक्क्यांपर्यंत वितळलेले दिसत आहे.

57 दिवसांची अमरनाथ यात्रा 3 जुलै रोजी सुरू झाली. गेल्या तीन दिवसांत 56,000 हून अधिक भाविकांनी या तीर्थक्षेत्राला भेट दिली असून, ही संख्या गेल्यावर्षीच्या तुलनेत 18.6 टक्क्यांनी वाढली आहे. 2025 मध्ये पहिल्या तीन दिवसांत 47,972 भाविक दर्शनासाठी आले होते. यावर्षी 4,00,000 भाविकांनी यात्रेसाठी नोंदणी केली आहे. भाविक 48 किलोमीटर लांबीच्या नुनवान-पहलगाम मार्गाने आणि लहान, पण अधिक कठीण असलेल्या 14 किलोमीटरच्या बाल्टाल मार्गाने सातत्याने येत आहेत. ही यात्रा 28 ऑगस्ट रोजी रक्षाबंधनाच्या दिवशी समाप्त होईल. जम्मू काश्मीरमधील वार्षिक अमरनाथ यात्रेच्या मार्गावर सैनिक कडक पहारा देत आहेत.

जम्मू काश्मीर प्रशासनाने नोंदणीशिवाय अमरनाथला येणाऱ्या यात्रेकरूंना आपली यात्रा काही दिवसांसाठी पुढे ढकलण्यास सांगितले आहे. 9 जुलैपर्यंत नोंदणीच्या सर्व जागा भरल्यामुळे नोंदणीशिवाय बाल्टाल किंवा पहलगाम मार्गाने पुढे जाण्याचा प्रयत्न करणाऱ्या कोणत्याही यात्रेकरूला तपासणी नाक्यांवर रोखले जाऊ शकते. त्यांना 9 जुलैनंतरच पुढे जाण्याची परवानगी दिली जाईल. रविवारपासून केवळ नोंदणीकृत यात्रेकरूंनाच काश्मीरच्या दिशेने पुढे जाण्याची परवानगी दिली जात आहे.