भारताविरुद्धच्या पाचव्या टी-20 सामन्यात धडाकेबाज शतक झळकावून इंग्लंडचा यष्टिरक्षक-फलंदाज जोस बटलरने एक महत्त्वपूर्ण टप्पा गाठला. या खेळीदरम्यान, टी-20 आंतरराष्ट्रीय क्रिकेटमध्ये सर्वाधिक धावा करणाऱ्यांच्या यादीत त्याने विराट कोहलीला मागे टाकले. बटलरने 51 चेंडूत आपले शतक पूर्ण केले. अखेरीस 64 चेंडूत 131 धावांची दमदार खेळी साकारली. त्याच्या शतकाच्या आणि हॅरी ब्रूकच्या नाबाद 95 धावांच्या जोरावर, इंग्लंडने 20 षटकांत 3 बाद 257 धावांचा प्रचंड डोंगर उभारला.

जोस बटलर आता जागतिक स्तरावर टी-20 आंतरराष्ट्रीय क्रिकेटमध्ये सर्वाधिक धावा करणारा तिसरा फलंदाज बनला आहे. या यादीत त्याने विराट कोहलीला मागे टाकले. कोहलीने आपल्या टी-20 आंतरराष्ट्रीय कारकिर्दीत 125 सामन्यांत 4188 धावा केल्या होत्या. ज्यात एका शतकाचा आणि 38 अर्धशतकांचा समावेश होता.

याउलट, बटलरने आतापर्यंत 160 सामन्यांत 4212 धावा केल्या आहेत. त्याच्या नावावर दोन शतके आणि 28 अर्धशतके आहेत. या सामन्यापूर्वी कोहलीला मागे टाकण्यासाठी त्याला 108 धावांची गरज होती आणि 131 धावांच्या खेळीमुळे त्याने तो टप्पा सहज ओलांडला.

टी-20 आंतरराष्ट्रीय क्रिकेटमध्ये सर्वाधिक धावांचा विक्रम पाकिस्तानच्या बाबर आझमच्या नावावर आहे. बाबरने 145 सामन्यांत 4596 धावा केल्या असून, त्याच्या नावावर तीन शतके आणि 39 अर्धशतके आहेत.

या यादीत भारताचा माजी कर्णधार रोहित शर्मा दुसऱ्या स्थानावर आहे. रोहितने 159 सामन्यांत 4231 धावा केल्या असून, त्याने पाच शतके आणि 32 अर्धशतके झळकावली आहेत. आता पुढील टी-20 आंतरराष्ट्रीय सामन्यात 20 धावा करताच बटलर रोहितला मागे टाकण्याच्या स्थितीत असेल. मात्र, बाबर आझमचा विक्रम मोडण्यासाठी त्याला आणखी 385 धावांची गरज आहे.

पाचव्या टी-20 सामन्यात इंग्लंडने भारताचा 56 धावांनी पराभव करून मालिका 4-0 ने जिंकली. प्रथम फलंदाजी करताना इंग्लंडने 20 षटकांत 3 बाद 257 धावा केल्या. जोस बटलरच्या 131 धावांच्या जोडीला कर्णधार हॅरी ब्रूकने 95 धावांची नाबाद खेळी केली.

258 धावांच्या आव्हानाचा पाठलाग करताना भारतीय संघाला 20 षटकांत 8 बाद 201 धावाच करता आल्या. मालिकेतील पहिला सामना पावसामुळे रद्द झाला होता. त्यानंतर भारताला सलग चार सामन्यांत पराभवाचा सामना करावा लागला आणि इंग्लंडने ही मालिका एकतर्फीपणे जिंकली.