आपलं कुटुंब आनंदी आणि निरोगी असावं असं प्रत्येकाला वाटतं. पण काही काय होईल सांगता येत नाही. असंच काही जळगाव येथील यावल तालुक्यातील किनगाव याठिकाणी घडलं आहे. अंध नवऱ्याने आईसोबत एक मोठा कट रचन 70 टक्के अंध बायको आणि अंध मुलाला विहिरीत ढकलल्याची धक्कादायक घटना समोर येत आहे. या घटनेत मुलाचा मृत्यू झाला असून, विहिरीतील एका लाकडी दांड्याचा आधार घेत महिलेने स्वतःचे प्राण वाचवले आहे. सध्या महिलेवर रुग्णालयात उपचार सुरु आहेत.

घडलेल्या या धक्कादायक घटनेनंतर पती आणि सासू विरोधात पोलीस स्थानकात खून आणि खूनाचा प्रयत्न करण्यात आल्याची तक्रार दाखल करण्यात आली आहे. तर पोलिसांनी दोन्ही संशयितांना ताब्यात घेतलं असून, पोलीस चौकशी सुरु आहे. मिळालेल्या माहितीनुसार, 13 जुलै रोजी सकाळी साडेआठच्या सुमारास किनगान येथील विहिरीत एक महिला आणि मुलगा पडल्याची माहिती पोलिसांना मिळाली. सुरुवातील हा कोणता घातपात नसून, अपघात आहे… असं सर्वांना वाटलं, पण जेव्हा पोलिसांनी कसून चौकशी सुरु केली, तेव्हा धक्कादायक घटना समोर आली.

मुलाच्या अंत्यसंस्कारानंतर पोलिसांनी महिलेची कसून चौकशी केली. तेव्हा महिलेने धक्कादायक माहिती दिली. शेतातील विहिरीची पूजा करण्यासाठी गेलेल्या सासूने आणि पतीने विहीरीत ढकलल्याचा आरोप महिलेने केला आहे. तक्रारीत नमूद केल्याप्रमाणे, महिला गर्भवती असताना वैद्यकीय तपासात असं समोर आलेलं की, बाळ अंध आहे… त्यामुळे पतीने महिलेला गर्भपात करण्यास सांगितलं होतं. पण तरी देखील महिलेने मुलाला जन्म दिला.

अंध मुलाच्या जन्मानंतर पती – पत्नीमध्ये सतत वाद होऊ लागले. याच कारणामुळे दोघांमधील भांडणं टोकाला गेली आणि गंभीर घटना घडली.. असं संशय पोलिसांकडून व्यक्त करण्यात येत आहे. याप्रकरणी पोलीस कसून चौकशी करत असून पती स्वप्नील भागवत पाटील आणि सासू आशाबाई भागवत पाटील पोलिसांच्या ताब्यात आहेत.