கேரள மாநிலத்தில் உள்ள புகழ்பெற்ற செயின்ட் கிரிகோர்ஸ் டென்டல் கல்லூரியில் பயிலும் மாணவ-மாணவிகள், தங்களது கல்லூரியில் பணிபுரியும் காவலாளிக்குச் செய்த ஒரு சுவாரஸ்யமான மற்றும் நெகிழ்ச்சியான காரியம் தற்போது இணையத்தில் பெருமளவில் பேசப்பட்டு வருகிறது.
ஜானி செட்டன் என்று அன்போடு அழைக்கப்படும் அந்தத் தள்ளாத வயதான காவலாளி, கல்லூரி வளாகத்தில் அனைவரிடமும் பாசமுடன் பழகக்கூடியவர். அவரின் நீண்ட கால அர்ப்பணிப்புக்கும் அன்புக்கும் நன்றி செலுத்தும் விதமாக, அந்த மாணவக் குழுவினர் அவருக்கு ஒரு இன்ப அதிர்ச்சியை வழங்கத் திட்டமிட்டனர்.
View this post on Instagram
A post shared by Haripriyah (@haripriya.hamesh)
இதன் ஒரு பகுதியாக, ஜானி செட்டனின் முகத்தை மிகத் துல்லியமாகத் தங்களது சொந்தக் கைவண்ணத்தில் வரைந்து ஒரு அழகான ஓவியத்தை அவர்கள் பிரத்யேகமாகத் தயாரித்தனர். பின்னர், அழகாகப் பொதிந்து வைக்கப்பட்டிருந்த அந்தப் பரிசை அவரிடம் மாணவர்கள் வழங்கினர்.
அதைப் பிரித்துப் பார்த்த ஜானி செட்டன், அதில் தனது உருவப்படம் இருப்பைக் கண்டு பெரும் வியப்பும் மகிழ்ச்சியும் அடைந்தார். தன் வாழ்நாளில் தனக்காக யாராவது இவ்வளவு மெனக்கெட்டுப் பரிசளிப்பார்கள் என்று எதிர்பார்க்காத அவர், உணர்ச்சிவசப்பட்டுத் தன் கண்களில் கசிந்த நீருடன் அந்த ஓவியத்தைப் பெருமையுடன் அனைவருக்கும் காட்டிய அந்த நெகிழ்ச்சியான தருணம் அங்கிருந்த அனைவரையும் உருகச் செய்தது.
இந்த மனதைத் தொடும் நிகழ்வை மாணவர்களில் ஒருவரான ஹரிபிரியா ஹமேஷ் என்பவர் தனது சமூக வலைதளப் பக்கத்தில் காணொளியாகப் பகிர்ந்துள்ளார். ‘தூய ஆன்மா’ என்ற எளிய தலைப்புடன் பகிரப்பட்ட இந்தக் காணொளி, தற்போது இன்ஸ்டாகிராம் உள்ளிட்ட சமூக வலைதளங்களில் மிக வேகமாகப் பரவி வருகிறது. விலைமதிப்பற்ற ஆடம்பரப் பரிசுகளைவிட, அன்போடு செய்யப்படும் கைவினைப் பரிசுகளே அதிக எடையைக் கொண்டுள்ளன என்பதை நிரூபித்துள்ள இந்த மாணவ-மாணவியரின் செயலுக்கு இணையவாசிகள் பலரும் தங்களது பாராட்டுக்களையும் வாழ்த்துக்களையும் தெரிவித்து வருகின்றனர்.
