Maharashtra Rain Update: राज्यातील पावसाचा जोर आता पुन्हा एकदा वाढण्याची शक्यता आहे. परतीच्या मान्सूनमुळे राज्यात पावसासाठी पोषक वातावरण तयार झाले आहे. आज विदर्भ आणि मराठवाड्यात मुसळधार पावसाची शक्यता आहे. त्यामुळे काही जिल्ह्यांमध्ये पावसाचा अलर्ट जारी करण्यात आला आहे. आज राज्यातील कोणत्या जिल्ह्यांमध्ये कसे हवामान असेल याबाबत सविस्तर माहिती जाणून घेऊयात.

विदर्भासह मराठवाड्यात पावसाची शक्यता

आज हवामान विभागाने विदर्भातील अमरावती, वर्धा, नागपूर आणि भंडारा या जिल्ह्यांमध्ये मुसळधार पावसाची शक्यता वर्तवली आहे. या सर्व जिल्ह्यांना पावसाचा यलो अलर्ट जारी करण्यात आला आहे. तसेच मराठवाड्यातील बीड, परभणी, नांदेड, लातूर आणि धाराशिव या जिल्ह्यांनाही पावसाचा अलर्ट देण्यात आला आहे. या काळात शेतकऱ्यांना शेतमालाची काळजी घेण्याचं आवाहन करण्यात आले आहे.

हायकोर्टाने मुंबई विद्यापीठाची विनंती केली मान्य, तांत्रिक अडचणीमुळे 24 सप्टेंबरला पार पडणार सिनेट निवडणूक

मध्य आणि उत्तर महाराष्ट्रातही पावसाची शक्यता

आज मध्य पुणे, अहमदनगर, सातारा, सांगली आणि सोलापूर जिल्ह्यांमधील काही भागात पावसाची शक्यता आहे. त्यामुळे या जिल्ह्यांना पावसाचा येलो अलर्ट जारी करण्यात आला आहे. तसेच आज उत्तर महाराष्ट्रातील नाशिक, धुळे, नंदुरबार, जळगाव या जिल्ह्यांमध्येही पावसाची शक्यता आहे अशी माहिती हवामान विभागाने दिली आहे.

मुंबईतही पावसाची शक्यता

आज मुंबईसह उपनगरातही पावसाची शक्यता आहे. आज मुंबई, ठाणे, पालघर, रायगड, रत्नागिरी तसेच सिंधुदुर्ग या कोकणातील जिल्ह्यांमध्येही हलक्या पावसाची शक्यता आहे. त्यामुळे नागरिकांनी योग्य ती काळजी घ्यावी असे आवहन करण्यात आले आहे.

उत्तर प्रदेशात पावसाची विश्रांती

उत्तर प्रदेशच्या पूर्व आणि पश्चिम दोन्ही भागात आज हवामान कोरडे राहण्याचा अंदाज आहे. आज दोन्ही भागात पावसाबाबत कोणताही इशारा देण्यात आलेला नाही. मात्र येत्या काही दिवसांत राज्यात हलका पाऊस पडण्याची शक्यता आहे. मात्र कुठेही मुसळधार पावसाची शक्यता नाही.

दिल्लीत कोरड्या हवामानाची शक्यता

गेल्या दोन दिवसांपासून दिल्ली-एनसीआरमध्ये पावसाने विश्रांती घेतली आहे. हवामान खात्याच्या अंदाजानुसार दिल्लीत आज ढगाळ वातावरण राहण्याची शक्यता आहे, मात्र पावसाची शक्यता नाही. राजधानीत आज कमाल तापमान 36 अंश सेल्सिअस तर किमान तापमान 25 अंश सेल्सिअस राहण्याचा अंदाज आहे.