Yashasvi Jaiswal Brother Tejasvi Struggle Story: कोणत्याही माणसाला आयुष्यात यशस्वी होण्यासाठी संघर्ष करावाच लागतो. पण अनेकदा कुटुंबातल्या लोकांच्या योगदानामुळे आणि त्यागामुळे काही माणसांचा यशाचा मार्ग खुला होतो. तेजस्वी जैस्वालच्या आयुष्यातही असंच काहीसं घडलं आहे. क्रिकेटपटू यशस्वी जैस्वालचा मोठा भाऊ तेजस्वी जैस्वाल सध्या चर्चेत आहे. भारतातल्या उदयोन्मुख क्रिकेटपटूंच्या यादीत यशस्वी जैस्वालच्या नावाचा समावेश होतो. मात्र यशस्वी जैस्वालचं स्वप्न पूर्ण व्हावं म्हणून तेजस्वीने मोठा त्याग केला होता. (Tejaswi Jaiswal News)

कुटुंबाची आर्थिक स्थिती खराब असल्याने तेजस्वी (Tejaswi Jaiswal) आणि यशस्वी जैस्वाल (Yashswi Jaiswal) यांना सुरुवातीला एकाच वेळी क्रिकेट खेळणं परवडणारं नव्हतं. ही गोष्ट लक्षात आल्यानंतर तेजस्वीने आपलं क्रिकेट खेळायचं स्वप्न बाजूला सारलं. तेजस्वी 2013 साली मुंबई सोडून दिल्लीत परत गेला. त्याने आपल्या भावासाठी क्रिकेटला काही काळासाठी अलविदा केला. दिल्लीत राहून तेजस्वीने कुटुंबाची सगळी आर्थिक जबाबदारी सांभाळण्याचा निर्णय घेतला. त्याने दोन्ही बहिणींची लग्नदेखील लावून दिली. त्याने सांगितलं की, 'मला क्रिकेट खेळणं शक्य नव्हतं. कारण कुटुंबाची आर्थिक परिस्थिती चांगली नव्हती.'

तेजस्वीला क्रिकेटच्या क्षेत्रात आणखी एका आव्हानाचा सामना करावा लागला. तेजस्वीने खोटं वय दाखवल्याचा आरोप त्याच्यावर करण्यात आला. त्यामुळे एक वर्षापेक्षा जास्त काळ त्याला क्रिकेट खेळता आलं नाही. त्यावेळी दोन वेळचं अन्न मिळवण्यासाठीही त्याला संघर्ष करावा लागत होता. पण यशस्वीला क्रिकेटच्या क्षेत्रात चांगलं यश मिळालं. तेजस्वी सांगतो की,' 2021 च्या आसपास यशस्वीला आयपीएलचं कॉन्ट्रॅक्ट मिळालं आणि माझ्या बहिणींचंही लग्न झालं. त्यानंतर आयुष्यात बराच फरक पडला. यशस्वीच्या सपोर्टमुळे कुटुंबाची आर्थिक परिस्थिती हळुहळू सुधारायला लागली.'

तेजस्वी जैस्वालने 27 व्या वर्षी रणजी ट्रॉफीसाठी (Ranji Trophy) अर्धशतकी खेळी करत क्रिकेटमध्ये दमदार कमबॅक केलं. आता तो एक उत्तम क्रिकेटपटू म्हणून नावारुपाला आला आहे. तेजस्वीचा लहान भाऊ यशस्वीने भावाची कामगिरी पाहिल्यानंतर लिहिलं की,' तू कुटुंबातल्या सगळ्या लोकांसाठी कायम त्याग केला आहेस. आता तुझ्यासाठी चांगला काळ सुरु झाला आहे. याचा पुरेपूर आनंद घे.'

बडोदा विरुद्ध त्रिपुरा या रणजी ट्रॉफीच्या सामन्यामध्ये तेजस्वी जैस्वालने अर्धशतक केलं. हा सामना 6 नोव्हेंबर 2024 ला खेळला गेला. या सामन्याच्या पहिल्या इनिंगमध्ये त्याने त्रिपुराच्या टीमकडून खेळताना 159 बॉलमध्ये 51.57 च्या स्ट्राइक रेटने 82 धावा केल्या. त्याने यावेळी 12 चौकार आणि एक षट्कार मारत सगळ्यांची मने जिंकली.