World Television Day 2024: टेलिव्हिजन अर्थात दूरदर्शन हे जनसंवादाचं एक उत्तम माध्यम आहे. टेलिव्हिजनमुळे वेगवेगळ्या विषयांची माहिती आपल्याला मिळते. करमणूक करणं आणि शिक्षण देणं, विविध विषयांच्या ज्ञानात भर टाकणं या सगळ्यासाठी टेलिव्हिजन उपयुक्त आहे. (World Television Day 2024 Date, History, Significance, Theme and Interesting Facts)

जागतिक टेलिव्हिजन दिनाची तारीख ( World Television Day Date)टेलिव्हिजनचं महत्त्व अधोरेखित करण्यासाठी दरवर्षी 21 नोव्हेंबरला जागतिक टेलिव्हिजन दिन साजरा केला जातो. या दिवसाचा इतिहास आणि महत्त्व काय आहे ते जाणून घेऊयात. जागतिक टेलिव्हिजन दिनाची यंदाची खास थीम काय आहे, ते पाहूयात. तसेच भारतातला टीव्हीचा इतिहासही जाणून घेऊयात.


टीव्हीचा शोध कधी लागला ? (Who Invented Television ?)अमेरिकन शास्त्रज्ञ जॉन लोगी बेयर्ड ( John Logie Baird) यांनी टेलिव्हिजनचा शोध लावला. पण या टीव्हीला मूर्त स्वरुप देण्यासाठी सात वर्षांचा कालावधी लागला. त्यामुळे 1934 मध्ये तो पूर्णपणे तयार झाला. पुढे मग 2 वर्षांनी टीव्ही स्टेशन्स सुरु झाल्याने लोकांना मनोरंजनाचा नवा पर्याय सापडला.

जागतिक टेलिव्हिजन दिनाचा इतिहास ( History Of World Television Day )संयुक्त राष्ट्र महासभेने 1996 साली 21 नोव्हेंबर हा दिवस जागतिक टेलिव्हिजन दिन म्हणून साजरा करण्याची घोषणा केली. पहिल्या जागतिक टेलिव्हिजन फोरमचं आयोजन या दिवशी करण्यात आलं होतं. या फोरममध्ये 50 देशांमधल्या 130 पेक्षा जास्त लोकांनी सहभाग घेतला. टेलिव्हिजनचं महत्त्व आणि भविष्य याविषयी वक्त्यांनी या फोरममध्ये मार्गदर्शन केलं. टेलिव्हिजनमध्ये अनेक तांत्रिक सुधारणा करण्यासाठी तसेच विविध स्तरांवर एकमेकांना मदत करण्यासाठी प्रयत्न करण्याबाबत सगळ्या देशांचं एकमत झालं. पहिल्या जागतिक टेलिव्हिजन फोरमचं आयोजन 21 नोव्हेंबरला करण्यात आलं होतं. त्यामुळे महासभेने याच दिवशी जागतिक टेलिव्हिजन दिन साजरा करण्याचा निर्णय घेतला.

जागतिक टेलिव्हिजन दिनाचं महत्त्व (Significance And Importance Of World Television Day )या दिवशी टेलिव्हिजनचं आपल्या आयुष्यात किती महत्त्व आहे, यावर चर्चा केली जाते. टीव्हीच्या प्रसारणाच्या प्रक्रियेत कोणते बदल करता येतील, याविषयी या दिवशी चर्चा केली जाते. गेली अनेक वर्षे टीव्ही हा आपल्या आयुष्याचा अविभाज्य भाग आहे. प्रत्येक वयोगटातल्या व्यक्तीसाठी टीव्ही उपयुक्त आहे. टीव्हीचा आपल्या आयुष्यावर कसा परिणाम होतोय, याविषयी जागतिक टेलिव्हिजन दिनाला जनजागृती केली जाते.

जागतिक टेलिव्हिजन दिन 2024 ची थीम ( World Television Day 2024 Theme)जागतिक टेलिव्हिजन दिनानिमित्त दरवर्षी एक थीम ठरवली जाते. जागतिक टेलिव्हिजन दिनाची 2024 ची थीम 'Television : Connecting The World' अशी आहे. टेलिव्हिजनमुळे वेगवेगल्या देशांमधले लोक, वेगवेगळ्या संस्कृतीचं पालन करणारे लोक कसे जोडले गेलं आहेत, हे सगळ्यांना पटवून सांगणं, हा या थीममागचा उद्देश आहे.


भारतातला टेलिव्हिजनचा इतिहास (History Of Indian Television)भारतात टीव्ही येण्यासाठी लोकांना बरीच वाट बघावी लागली. भारतात 1950 ला पहिल्यांदा टीव्ही पोहोचला. त्यानंतर 15 सप्टेंबर 1959 ला भारतात दूरचित्रवाणी / दूरदर्शनची स्थापना झाली. ऑल इंडिया रेडिओच्या माध्यमातून प्रायोगिक तत्वावर टेलिव्हिजन प्रसारणाचं काम तेव्हा सुरु होतं. सुरुवातीला विद्यार्थ्यांसाठी आणि शेतकऱ्यांसाठी कार्यक्रम टीव्हीवर दाखवले जायचे. एशिनय गेम्सच्या काळात रंगीत टीव्ही आले. त्यानंतर टेलिव्हिजनच्या क्षेत्रात आजवर अनेक बदल घडले आहेत. या बदलांचे आपण सगळे साक्षीदार आहोत. इंटरनेटमुळे टेलिव्हिजनच्या क्षेत्रात क्रांती घडत आहे.