मुंबई : भारत ग्लोबल डेव्हलपर्स लिमिटेडने त्यांच्या प्रस्तावित बोनस शेअर आणि स्टॉक स्प्लिटसाठी रेकॉर्ड तारीख तात्पुरती पुढे ढकलली आहे. भांडवली बाजार नियामक सेबीने 23 डिसेंबर रोजी शेअर्सचे व्यवहार निलंबित केल्यानंतर कंपनीने हे पाऊल उचलले आहे. शेअर बाजाराला दिलेल्या स्पष्टीकरणात, भारत ग्लोबल डेव्हलपर्सने सांगितले की या प्रकरणाचा आढावा घेतला जात आहे. परंतु कंपनी नियामक अनुपालन, पारदर्शकता आणि कॉर्पोरेट गव्हर्नन्सच्या सर्वोच्च मानकांसाठी वचनबद्ध आहे.कंपनीने म्हटले, आमच्या कायदेशीर आणि अनुपालन संघांशी काळजीपूर्वक चर्चा केल्यानंतर आणि अंतरिम आदेश लक्षात घेऊन, कंपनीने प्रस्तावित बोनस इश्यू आणि स्टॉक स्प्लिटसाठी रेकॉर्ड तारीख निश्चित करण्याची प्रक्रिया तात्पुरती पुढे ढकलली आहे भारत ग्लोबल डेव्हलपर्सने भागधारकांना 8:10 च्या प्रमाणात बोनस शेअर्स देण्याचा निर्णय घेतला आहे. याचा अर्थ भागधारकांना त्यांच्याकडे असलेल्या प्रत्येक 10 शेअर्समागे बोनस म्हणून 8 नवीन शेअर्स मिळतील. स्टॉक स्प्लिट अंतर्गत कंपनीने 10 रुपये दर्शनी मूल्याचा एक शेअर प्रत्येकी 1 रुपये दर्शनी मूल्याच्या 10 शेअर्समध्ये विभाजनाचा निर्णय घेतला आहे. बोनस शेअर्स आणि स्टॉक स्प्लिट या दोन्हीसाठी रेकॉर्ड तारीख 26 डिसेंबर 2024 निश्चित करण्यात आली होती. मात्र आता ती पुढे ढकलण्यात आली आहे.सेबीने आपल्या आदेशात म्हटले की खोट्या खुलाशांच्या आधारे कंपनी गुंतवणूकदारांना शेअर्स खरेदी करण्यास प्रवृत्त करण्याचा प्रयत्न करत आहे. याशिवाय, गुंतवणुकदारांची दिशाभूल करण्यासाठी आणि आमिष दाखवण्यासाठी बनावट आदेश आणि करार देखील जारी करत आहे. भारत ग्लोबलच्या शेअर्समध्ये झालेली वाढ ही चुकीच्या आर्थिक परिस्थितीचा परिणाम होती आणि शेअर्सच्या किमतीतील वाढ विशिष्ट प्राधान्य वाटप करणाऱ्यांना लाभ देण्यासाठी आणली गेली.शुक्रवार 20 डिसेंबर 2024 रोजी कंपनीचे शेअर्स 1236.45 रुपयांवर बंद झाले. गेल्या एका वर्षात शेअर्समध्ये 2351.81 टक्के आणि 3 महिन्यांत 100 टक्क्यांहून अधिक वाढ झाली आहे. कंपनीचे मार्केट कॅप 12,520 कोटी रुपये आहे. भारत ग्लोबल डेव्हलपर्सने सांगितले की, ते त्यांच्या भागधारकांच्या हिताचे रक्षण करण्यासाठी समर्पित आहे आणि उद्भवलेल्या समस्यांचे निराकरण करण्यासाठी सेबीला सक्रियपणे सहकार्य करत आहे. कंपनीला लवकरात लवकर योग्य आणि ठोस तोडगा काढण्याचा विश्वास आहे. मात्र, या समस्येवर कधी तोडगा निघेल हे कंपनीने सांगितले नाही.