தமிழக எல்லையில் உள்ள மேட்டூர் சோதனைச்சாவடி வழியாக கர்நாடகாவில் இருந்து தினமும் ஏராளமான வாகனங்கள் சென்று வருகின்றன. அதேபோல், பிற மாநிலங்களில் இருந்து வரும் வாகனங்களும் இந்த சோதனைச்சாவடி வழியாக கர்நாடகாவிற்குள் நுழைகின்றன. இந்தச் சோதனைச் சாவடியில் காவல்துறையினரால் வாகனச் சோதனையின் போது விலை மலிவு சாராயம் மற்றும் கஞ்சா அடிக்கடி சிக்குவதால் தீவிர சோதனை நடத்த மாவட்ட காவல்துறைத் தலைவர் உத்தரவிட்டுள்ளார்.
இந்நிலையில், மதுவிலக்கு சோதனைச் சாவடியில் வழக்கம்போல் பாதுகாப்புப் பணியில் ஈடுபட்டிருந்த போலீஸார், அவ்வழியாக வந்த உத்தரப் பிரதேசத்தைச் சேர்ந்த சொகுசுப் பேருந்தை நிறுத்தி சோதனையிட்டனர். உத்தரபிரதேசத்தில் இருந்து கர்நாடகாவில் உள்ள மாதேஸ்வரன் மலைக்கோயிலுக்கு சுற்றுலா பயணிகள் சென்றதாக கூறப்படுகிறது. இதையடுத்து, வாகனத்தை நிறுத்தி, கர்நாடகா செல்ல அனுமதிச் சீட்டு உள்ளதா எனக் கேட்டபோது, பேருந்தில் இருந்தவர்கள், தங்களிடம் அனுமதிச் சீட்டு இல்லை என்றும், அது இல்லாமல் உள்ளே செல்ல அனுமதிக்குமாறும் கூறினர்.
போலீசார் மறுத்ததால், இரு தரப்பினருக்கும் இடையே வாக்குவாதம் ஏற்பட்டு, ஆத்திரமடைந்த உத்தரபிரதேசத்தைச் சேர்ந்த சிலர், காவல் துறையினரை சரமாரியாக தாக்க முயன்றனர். அவர்களிடம் தமிழக பொதுமக்கள் அமைதியான முறையில் பேசியதால் ஆத்திரம் அடைந்து தமிழக மக்களை அவமானப்படுத்தியதுடன், காவல்துறையினரையும் தாக்கினர். இதில், சுகனேஸ்வரன், செந்தில்குமார் ஆகிய இரு போலீஸார் பலத்த காயமடைந்தனர்.
இதனால் ஆத்திரமடைந்த அப்பகுதி கிராம மக்கள், போலீசாருக்கு ஆதரவாக வடமாநில மக்களை தாக்கி விரட்டியடித்தனர். தகவலறிந்து கொளத்தூர் போலீசார் சென்று பொதுமக்களை சமாதானம் செய்து உத்தரபிரதேசத்தில் இருந்தவர்களை காவல் நிலையம் அழைத்து சென்று விசாரணை நடத்தினர். உண்மையில் வாகன அனுமதிப்பத்திரத்துக்காக போலீசார் மீது தாக்குதல் நடத்தப்பட்டதா? மேலும் விசாரணை நடத்தப்பட்டு வருகிறது.
இதற்கிடையே சம்பவ இடத்திற்கு வந்த காவல் கண்காணிப்பாளர் சுற்றுலா பயணிகளிடம் விசாரணை நடத்தினார். அப்போது, நான்கு பேர் மட்டுமே சம்பவத்தில் ஈடுபட்டதால், அவர்களை கைது செய்து அழைத்துச் சென்றனர். குடிபோதையில் அவர்கள் தாக்கியது தெரியவந்தது. அங்கு சுற்றுலா பேருந்து நிறுத்தப்பட்டுள்ளது. அப்பகுதியில் கடும் பதற்றம் நிலவுவதால் அங்கு கூடுதல் போலீசார் பாதுகாப்பு பணியில் ஈடுபட்டுள்ளனர்.
