कोल्हापूर : राज्याचे उच्च व तंत्रशिक्षण, संसदीय कार्यमंत्री चंद्रकांत पाटील हे मंत्रिपद मिळाल्यानंतर प्रथमच रविवारी (ता. २९) कोल्हापुरात येत आहेत. त्यांचे भाजपच्या वतीने कोल्हापूर रेल्वेस्थानक येथे सकाळी स्वागत करण्यात येणार आहे. यानंतर सायंकाळी सहा ते आठ या वेळेत नागाळा पार्क येथील भाजप कार्यालय येथे उपस्थित राहून ते शुभेच्छा स्वीकारणार आहेत.

पुणे : आपल्या सुमधुर आवाजाने हिंदी चित्रपटसृष्टीवर अधिराज्य गाजविणाऱ्या प्रसिद्ध गायिका श्रेया घोषाल यांच्या शनिवारी होणाऱ्या संगीत मैफिलीची उत्सुकता आता शिगेला पोहोचली आहे. कोथरूडच्या सूर्यकांत काकडे फार्म येथे या मैफिलीची तयारी पूर्ण झाली आहे. ‘सकाळ माध्यम समूहा’तर्फे शनिवारी (ता. २८) सायंकाळी ६.३० वाजता श्रेया घोषाल यांच्या मैफिलीचे आयोजन करण्यात आले आहे.

बीड : संसदेपासून राज्य विधिमंडळाच्या हिवाळी अधिवेशनात गाजलेल्या मस्साजोग (ता. केज) येथील सरपंच संतोष देशमुख यांच्या हत्या प्रकरणाला तीन आठवडे उलटले तर अद्याप काही संशयित फरारी आहेत. त्यांना अटक आणि सूत्रधारावर खुनाचा गुन्हा नोंद करण्याच्या मागणीचा रेटा जिल्ह्यात कायम आहे. याच मागणीसाठी शनिवारी (ता. २८) बीडमध्ये सर्व जातीय, सर्व पक्षीय मूक मोर्चा काढण्यात येणार आहे. या मोर्चाच्या पार्श्वभूमीवर जिल्हा, पोलिस प्रशासन सावध झाले आहे. पोलिस अधीक्षक नवनीत कॉवत, अपर पोलिस अधीक्षक सचिन पांडकर, निवासी उपजिल्हाधिकारी शिवकुमार स्वामी आदींनी शुक्रवारी (ता. २७) सुरक्षेच्या दृष्टीने बैठक घेऊन बंदोबस्ताचा आढावा घेतला. दिवंगत देशमुख यांची मुलगी वैभवी, भाऊ धनंजय यांच्यासह मराठा आरक्षण आंदोलक मनोज जरांगे पाटील, सामाजिक कार्यकर्त्या अंजली दमानिया, राष्ट्रवादी काँग्रेसचे प्रतोद जितेंद्र आव्हाड, यांच्यासह भाजप आमदार सुरेश धस, राष्ट्रवादी काँग्रेसचे आमदार प्रकाश सोळंके, राष्ट्रवादी काँग्रेस शरदचंद्र पवार पक्षाचे आमदार संदीप क्षीरसागर आदी या मोर्चात सहभागी होणार आहेत.

चुलत बहिणीच्या मुलाचा वाढदिवसाचा कार्यक्रम आटोपून घरी परत जात असताना ऑटो डीवाईडरवर धडकून उलटल्याने मुलाचा आणि त्याच्या आईचा जागीच मृत्यू झाला. एमआयडीसी - वाडी मार्गावरील प्लास्टो कंपनी समोर गुरुवारी रात्री ही घटना घडली. याबाबत एमआयडीसी पोलिसांत नोंद झाली आहे. रोहित साखरे, करुणा साखरे असे मृत मायलेकाचे नाव आहे.

मुंबईतील खैराणी रोड साकिनाका परिसरात भीषण आग लागली आहे. या ठिकाणी असलेल्या गोदामाला आग लागली असून आगीत २ गोदामने पेट घेतला आहे. झोपडपट्टी भागात ही आग लागल्याने अग्निशामक दलाला शर्यतीचे प्रयत्न करावे लागत आहेत.

श्रीनगर : जम्मू-काश्मीरच्या कत्रा जिल्ह्यातील प्रस्तावित रोप-वे प्रकल्पाविरोधातील आंदोलन सलग तिसऱ्या दिवशी सुरूच होते. आणखी काही स्थानिकांनी उपोषण सुरू केल्याने या आंदोलनाची तीव्रता आणखी वाढली आहे. या प्रकल्पाच्याविरोधात श्री माता वैष्णो देवी संघर्ष समितीकडून ७२ तासांच्या बंदचे आवाहन करण्यात आले आहे.

बंगळूर : बंगळूरमध्ये विमानतळ सीमाशुल्क अधिकाऱ्यांनी आठ किलो उच्च दर्जाच्या हायड्रोपोनिक गांजाची तस्करी करण्याचा प्रयत्न हाणून पाडला. बँकॉकहून वेगळ्या फ्लाइटने आलेल्या दोन प्रवाशांकडून सुमारे ८० लाखांचा गांजा त्यांनी जप्त केला. हायड्रोपोनिक गांजा हा प्रयोगशाळेत पाण्यात पोषक द्रव्ये टाकून उगवला जातो. सीमाशुल्क अधिकाऱ्याने सांगितले की, केम्पेगौडा आंतरराष्ट्रीय विमानतळावर (केआयए) तीन आठवड्यांत या प्रकारच्या ड्रग्जची ही दुसरी जप्ती आहे. याप्रकरणी दोघे अनुक्रमे १९ डिसेंबर आणि २० डिसेंबर रोजी थायलंडहून विमानतळाच्या टर्मिनल दोनवर पोहोचले. प्रवाशांच्या प्रोफाईलिंगच्या आधारे त्यांना थांबवण्यात आले. २० दिवसांपूर्वी बँकॉकहून घरी परतत असल्याचे त्यांच्या पासपोर्टवरून स्पष्ट झाले. पर्यटक असल्याचे भासवणाऱ्या आणि काहीतरी तस्करी करू इच्छिणाऱ्यांनी ही पद्धत अवलंबली आहे. दोघेही मध्यमवयीन आणि भारतातीलच रहिवासी आहेत.

Latest Marathi Live Updates 28 December 2024 : माजी पंतप्रधान आणि थोर अर्थशास्त्रज्ञ मनमोहन सिंग यांचे गुरुवारी (ता. २६) निधन झाले. त्यांच्या पार्थिवावर आज दिल्लीतील राजघाटावर शासकीय इतमामात अंत्यसंस्कार केले जाणार आहेत.

तसेच मुंबईवरील दहशतवादी हल्ल्याचा सूत्रधार हाफीज सईदचा मेहुणा आणि बंदी घालण्यात आलेल्या जमात - उद् - दावा या दहशतवादी संघटनेचा म्होरक्या हाफीज अब्दुल रेहमान मक्की याचे हृदयविकाराच्या झटक्याने निधन झाले.

बेकायदा वाळू उत्खननप्रकरणी सक्तवसुली संचालनालयाने (ईडी) बिहारमध्ये पाटण्यासह अन्य काही शहरांत छापे घातले. राज्याचे उच्च व तंत्रशिक्षण, संसदीय कार्यमंत्री चंद्रकांत पाटील हे मंत्रिपद मिळाल्यानंतर प्रथमच रविवारी (ता. २९) कोल्हापुरात येत आहेत.

त्यांचे भाजपच्या वतीने कोल्हापूर रेल्वेस्थानक येथे सकाळी स्वागत करण्यात येणार आहे. खानदेशातील तीन जिल्ह्यांना शुक्रवारी बेमोसमी पावसाचा तडाखा बसला. जळगाव शहरासह जिल्ह्यातील यावल, रावेर तालुक्यात काल सायंकाळी मुसळधार पाऊस झाला.

काही ठिकाणी गारपीट झाली. राज्यात आजही ढगाळ वातावरण आहे. यासह देश आणि राज्यातील महत्त्वाच्या घडामोडी तसेच वाहतूक कोंडी, राजकीय घडामोडी, क्रीडा, मनोरंजन, मान्सून या सर्व घडामोडींचे अपडेट जाणून घ्या एका क्लिकवर..