भारत विरुद्ध इंग्लंड संघात टी२० मालिकेतील पहिला सामना कोलकातामधील ईडन गार्डन्स स्टेडियमवर खेळला जात आहे. या सामन्यात भारतीय गोलंदाजांची शानदार कामगिरी झाली. त्यामुळे इंग्लंडला भारतासमोर केवळ १३३ धावांचे लक्ष्य ठेवता आले आहे. तरी इंग्लंडकडून कर्णधार जॉस बटलरने एकाकी झुंज दिली.

या सामन्यात भारतीय संघाने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे प्रथम फलंदाजी करणाऱ्या इंग्लंडकडून बेन डकेट आणि फिलिप सॉल्ट यांनी डावाची सुरूवात केली.

मात्र पहिल्याच षटकात सॉल्टला शून्यावर माघारी धाडले. त्यानंतर कर्णधार जॉस बटलरने आक्रमक सुरुवात केली, पण तिसऱ्या षटकात अर्शदीपने डकेटलाही माघारी धाडले. पण त्यानंतर बटलरला हॅरी ब्रुकने साथ दिली होती. त्यांच्यात चांगली भागीदारीही रंगली होती. त्यामुळे इंग्लंडने ६० धावांचा टप्पा सहज पार केला.

पण ८ व्या षटकात वरूण चक्रवर्तीने केलेली गोलंदाजी कलाटणी देणारी ठरली. त्याने तिसऱ्या चेंडूवर ब्रुकला १७ धावांवर त्रिफळाचीत केले. त्यानंतर पाचव्या चेंडूवर त्याने लियाम लिव्हिंगस्टोनला शून्यावर त्रिफळाचीत केले.