Gold Price And Silver Rate Today: गेल्या आठवड्यात डॉलर निर्देशांकातील तेजीमुळे आंतरराष्ट्रीय बाजारात सोने सुमारे 2.7 टक्के घसरून डॉलर 2,858 प्रति औंस झाले. गेल्या तीन महिन्यांतील ही सर्वात मोठी साप्ताहिक घसरण आहे. स्थानिक बाजारात सोने घसरणीसह 84,219 रुपये प्रति 10 ग्रॅमवर पोहचले आहे. तज्ज्ञांचे म्हणणे आहे की, सोने लवकरच डॉलर 3,000 प्रति औंस पार करेल.

कामा ज्वेलरीचे एमडी कॉलिन शाह म्हणाले, व्यापार युद्ध आणि भू-राजकीय तणावाशी संबंधित अनिश्चिततेमुळे सोन्याच्या भावात वाढ होत आहे. आमचा अंदाज आहे की लवकरच आंतरराष्ट्रीय बाजारात डॉलर 3000 प्रति औंस आणि देशांतर्गत बाजारात 88,000 रुपयांच्या पातळीवर पोहोचेल.

अमेरिकेचे राष्ट्राध्यक्ष डोनाल्ड ट्रम्प यांनी मेक्सिको आणि कॅनडावर आयात शुल्क लादण्याबरोबरच चीनवर 10% ऐवजी 20% आयात शुल्क लावण्याचे जाहीर केले आहे.

या सोबतच वर्ल्ड गोल्ड कौन्सिलनुसार, 2022 आणि 2023 नंतर, केंद्रीय बँकांनी 2024 मध्ये देखील 1000 टनांपेक्षा जास्त सोने खरेदी केले आहे. RBIने 2024 मध्ये सुमारे 73 टन सोने खरेदी केले.

चीनच्या मध्यवर्ती बँकेने जानेवारीमध्ये सलग तिसऱ्या महिन्यात सोन्याचा साठा वाढवला आणि त्यांची अधिकृत होल्डिंग 2285 टनांवर पोहोचली. मध्यवर्ती बँकांकडून जास्त मागणीचा हवाला देऊन, गोल्डमन सॅचने 2025 च्या अखेरीस सोने डॉलर 2890 वरून डॉलर 3100 प्रति औंस वाढण्याची शक्यता वर्तवली आहे.

मोतीलाल ओसवाल यांनी त्यांच्या अल्फा स्ट्रॅटेजिस्ट अहवालात अल्पकालीन 'तटस्थ' आणि दीर्घकालीन 'सकारात्मक' दृष्टिकोन ठेवला आहे. त्यांनी म्हटले आहे की, सोन्याच्या किमती वाढण्यात जागतिक आर्थिक अनिश्चितता मोठी भूमिका बजावेल. केंद्रीय बँका त्यांच्या सोन्याचा साठा सातत्याने वाढवत आहेत. त्यामुळे येणाऱ्या काळात सोन्याचा भाव वाढण्याची शक्यता आहे.