पुणे, ता. १७ ः ‘‘समाजाकडून कलाकारांना मिळणारी कौतुकाची थाप आनंददायी आणि प्रेरणादायी असते,’’ अशी भावना ज्येष्ठ रंगकर्मी शुभांगी दामले यांनी व्यक्त केली. अखिल भारतीय नाट्य परिषदेची कोथरूड शाखा आणि शिवसाम्राज्य प्रतिष्ठान यांच्यातर्फे आयोजित कला क्षेत्रातील महिला कलाकारांच्या सन्मान सोहळ्यात त्या बोलत होत्या. यशवंतराव चव्हाण नाट्यगृहाचे रौप्य महोत्सवी वर्ष आणि जागतिक महिला दिनाचे औचित्य साधून कार्यक्रमाचे आयोजन करण्यात आले होते. या वेळी शुभांगी दामले, संगीत क्षेत्रात रुची असलेल्या शीला देशपांडे, संगीत रंगभूमीवरील ज्येष्ठ अभिनेत्री वर्षा जोगळेकर, अभिनेत्री अस्मिता चिंचाळकर, अभिनेत्री अश्विनी थोरात, निवेदिका रत्ना दहिवेलकर, उद्योजिका साधना विसाळ, अभिनेत्री नीता दोंदे आणि गायिका राधिका अत्रे यांचा देवकी सुतार यांच्या हस्ते सन्मान करण्यात आला.
या प्रसंगी अखिल भारतीय नाट्य परिषद कोथरूड शाखेचे अध्यक्ष सुनील महाजन, कार्यवाह सत्यजित धांडेकर, दीपक गुप्ते, नाट्यगृहाच्या व्यवस्थापिका सुजाता देवकर उपस्थित होते. सन्मान सोहळ्यानिमित्त ‘चांदण्यात फिरताना’ हा सांगीतिक कार्यक्रम सादर झाला. डॉ. मानसी अरकडी यांनी सूत्रसंचालन केले. सत्यजित धांडेकर यांनी आभार मानले.