चेन्नई सुपर किंग्स, हे इंडियन प्रीमियर लीगमधील नेहमीच गाजणारे नाव आहे. सर्वात यशस्वी संघांपैकी असलेला हा संघ यंदा १८ व्या हंगामात सहावे विजेतेपद जिंकण्याच्या हेतूने मैदानात उतरणार आहेत.

चेन्नईने आता ऋतुराज गायकवाडच्या नाववरच कर्णधार म्हणून शिक्कामोर्तब केले आहे. त्यामुळे आयपीएल २०२५ मध्येही ऋतुराज चेन्नईचे नेतृत्व करण्यास सज्ज आहे. त्याला या हंगामातही एमएस धोनीची साथ मिळणार आहे. धोनी संघात असणं चेन्नईसाठी दिलासा देणारे आहे. त्याला ४ कोटी रुपयांना संघात रिटेन केलं आहे.

चेन्नईसाठी गेल्यावर्षी प्लेऑफमधील स्थान अगदीच थोडक्यात गमवावे लागले होते. ते ५ व्या क्रमांकावर राहिले होते. चेन्नईने प्लेऑफमध्ये प्रवेश न करण्याची ही तिसरीच वेळ होती. पण आत्तापर्यंत चेन्नईचा इतिहास असा राहिला आहे की त्यांच्याकडून पुनरागमनात दमदार कामगिरी झाली आहे.

त्यांनी गेल्या ५ हंगामात दोनदा प्लेऑफ गाठली आहे आणि थेट विजेतेपदाला गवसणी घातली आहे. तीन वेळा त्यांना प्लेऑफमध्येच पोहचता आले नव्हते. तसेच आत्तापर्यंत असं कधीही झालेलं नाही की सलग दोन हंगामात धोनी आयपीएलचा अंतिम सामना खेळलेला नाही, त्यामुळे हा इतिहास पाहाता चेन्नईकडून यावर्षी मोठ्या अपेक्षा आहेत.

त्यातच आता हा धोनीचा अखेरचा हंगाम ठरणार का अशा चर्चांना उधाण आले आहे. त्यामुळे असे असेल, तर चेन्नई संघ त्याला विजयी निरोप देण्यास उत्सुक असेल.

चेन्नईने ऋतुराज गायकवाड, मथिशा पाथिराना, शिवम दुबे, रविंद्र जडेजा आणि एमएस धोनी या खेळाडूंना लिलावापूर्वीच कायम केले होते. याशिवाय त्यांनी गेल्या वर्षी त्यांच्याकडून खेळलेल्या रचिन रविंद्रलाही आरटीएम कार्ड वापरून संघात घेतले आहे.

त्याचबरोबर डेवॉन कॉनवे, शेख राशिद, मुकेश चौधरी यांनाही संघात पुन्हा घेण्यात चेन्नई यशस्वी ठरले आहेत. त्याचबरोबर आर अश्विन आणि सॅम करन यांचेही चेन्नई संघात पुनरागमन झाले आहे. त्यामुळे एकूणच चेन्नईचे प्रमुख खेळाडू आधीच संघात आहेत. अशात त्यांना संघ बांधण्यासाठी सोपे जाणार आहे. विशेष म्हणजे यंदा त्यांच्या संघात दुखापतीच्या चिंता कमी आहेत.

चेन्नईची सर्वात जमेची बाजू त्यांच्याकडे असलेले गोलंदाजीचे पर्याय ही आहे. फिरकी गोलंदाजीसाठी संघात रविंद्र जडेजा, नूर अहमद, श्रेयस गोपाळ, आर अश्विन हे खेळाडू आहेत, याशिवाय रचिन रवींद्र, दीपक हुडा हे फिरकी गोलंदाजी करणारे अष्टपैलू संघात आहेत. तसेच त्यांचं घरचं मैदान असलेल्या चेपॉक स्टेडियमवर फिरकी गोलंदाजांना मदत मिळते. त्यामुळे या खेळाडूंची कामगिरी महत्त्वाची ठरणार आहे.

वेगवान गोलंदाजीसाठी मथिशा पाथिराना, अंशुल कंबोज, नॅथन एलिस, कमलेश नागरकोटी, खलील अहमद, मुकेश चौधरी, गुरजपनीत सिंग हे खेळाडू आहेत, त्यांच्या साथीला शिवम दुबे, सॅम करन, विजय शंकर, जॅमी ओव्हरटन, रामकृष्ण घोष हे वेगवान गोलंदाजी करणारे अष्टपैलू संघात आहेत. त्यामुळे गोलंदाजीसाठी भरपूर पर्याय चेन्नईकडे आहेत, जेणेकरून ते कोणत्याही परिस्थितीत गोलंदाजीसाठी तयार असू शकतात.