Devendra Fadnavis LIVE : अर्थसंकल्पीय अधिवेशन संपताच मुख्यमंत्री देवेंद्र फडणवीस आज पंढरपूर दौऱ्यावर

सोलापूर : विधिमंडळाचे अर्थसंकल्पीय अधिवेशन संपताच मुख्यमंत्री देवेंद्र फडणवीस हे आज (ता. २९ मार्च) पंढरपूरच्या दौऱ्यावर येत आहेत. पंढरपूर दौऱ्यात ते श्री विठ्ठलाचे दर्शन घेऊन मंदिर कामाची पाहणी करणार आहेत. विविध विकास कामांचे भूमिपूजन आणि त्यानंतर फडणवीस हे माजी आमदार प्रशांत परिचारक यांच्या घरी भेट देणार आहेत. विधिमंडळाचे अर्थसंकल्पीय अधिवेशन नुकतेच बुधवारी (ता. २६ मार्च) संपलेय.

Prashant Koratkar LIVE : वकिलाचा प्रशांत कोरटकरवर हल्ल्याचा प्रयत्न, ॲड. अमितकुमार भोसलेंवर गुन्हा दाखल

कोल्हापूर : पोलिस कोठडीत असलेल्या प्रशांत कोरटकरला न्यायालयातून पोलिस परत घेऊन जात होते. त्याच्या भोवती पोलिसांचा गराडा होता. त्यातूनही एका वकिलाने त्याच्यावर हल्ल्याचा प्रयत्न केला. न्यायालयाच्या तळमजल्यातील कॅन्टीनजवळ हा प्रकार घडला. पोलिसांनी संबंधित वकिलास चपळाईने ताब्यात घेतल्यामुळे पुढील अनर्थ टळला. या प्रकरणी रुकडीचे माजी उपसरपंच ॲड. अमितकुमार नानासाहेब भोसले (वय ४५, रा. रुकडी, ता. हातकणंगले) यांच्यावर शांतता भंग केल्याचा गुन्हा दाखल केल्याची माहिती शाहूपुरी पोलिसांनी दिली.

Hasan Mushrif LIVE : हसन मुश्रीफांच्या 'त्या' वक्तव्याच्या निषेधार्थ इचलकरंजीत आज निदर्शने

इचलकरंजी : इचलकरंजी शहरासाठी शासनाने मंजूर केलेल्या सुळकूड पाणी योजनेची अद्याप अंमलबजावणी झालेली नाही. राजकीय दबावामुळे ही योजना रखडली असतानाच उपमुख्यमंत्री अजित पवार यांच्या दौऱ्यात मंत्री हसन मुश्रीफ यांनी ही योजना व्यवहार्य नसल्याचे वक्तव्य केले. त्यांच्या या वक्तव्याचा निषेध करण्यासाठी सुळकूड पाणी कृती समिती व इचलकरंजी नागरिक मंचच्या वतीने शनिवारी महात्मा गांधी पुतळ्याजवळ निदर्शने करण्यात येणार आहेत.

Surashree Music Festival : 'नाट्यपंढरी'त आजपासून सुरांची बरसात; गायन, गझल, हिंदी-मराठी गीतसंगीतासह वाद्यांची रंगणार जुगलबंदी

सांगली : मार्चअखेरचा तणाव बाजूला ठेवून दोन दिवस स्वतःच्या आनंदासाठी वेळ काढण्याची ही वेळ आहे. कारण आहे, आजपासून (ता. २९) दोन दिवस विष्णुदास भावे नाट्यमंदिरात, तेही वातानुकूलित वातावरणात होणारा ‘सुरश्री संगीत महोत्सव’, तोही अगदी मोफत. यामध्ये शास्त्रीय-उपशास्त्रीय गायन, गझल, हिंदी-मराठी गीतसंगीत आणि वाद्यांची जुगलबंदी रंगणार आहे.

Thailand, Myanmar Earthquake LIVE : थायलंड, म्यानमारला भूकंपाचा हादरा; भूकंपामुळे 144 जणांचा मृत्यू

Latest Marathi Live Updates 29 March 2025 : थायलंड आणि शेजारील म्यानमारला काल दुपारी ७.७ रिश्टर तीव्रतेच्या भूकंपाचा धक्का बसला. या भूकंपामुळे म्यानमारमध्ये १४४ जणांचा मृत्यू झाला असून, थायलंडची राजधानी बँकॉकमध्येही किमान आठजण मृत्युमुखी पडले आहेत. तसेच पोलिस कोठडीत असलेल्या प्रशांत कोरटकरला न्यायालयातून पोलिस परत घेऊन जात होते. त्याच्या भोवती पोलिसांचा गराडा होता. त्यातूनही एका वकिलाने त्याच्यावर हल्ल्याचा प्रयत्न केला. न्यायालयाच्या तळमजल्यातील कॅन्टीनजवळ हा प्रकार घडला. भारतरत्न डॉ. बाबासाहेब आंबेडकर यांच्या जयंतीदिनी १४ एप्रिलला केंद्र सरकारने ‘राष्ट्रीय सुटी’ जाहीर केली आहे. मुश्रीफ यांच्या 'त्या' वक्तव्याचा निषेध करण्यासाठी सुळकूड पाणी कृती समिती व इचलकरंजी नागरिक मंचच्या वतीने आज महात्मा गांधी पुतळ्याजवळ निदर्शने करण्यात येणार आहेत. मुख्यमंत्री देवेंद्र फडणवीस हे आज पंढरपूरच्या दौऱ्यावर येत आहेत. त्याचबरोबर राज्यातील वातावरणात बदल पहायला मिळत असून काही भागांत पाऊस पडत आहे. यासह देश आणि राज्यातील महत्त्वाच्या घडामोडी तसेच वाहतूक कोंडी, राजकीय घडामोडी, क्रीडा, मनोरंजन, मान्सून या सर्व घडामोडींचे अपडेट जाणून घ्या एका क्लिकवर..