भरधाव बेस्ट बसने डिलिव्हरी बॉयला चिरडल्याची घटना शनिवारी रात्री मुंबईतील प्रभादेवी परिसरात घडली. याप्रकरणी बेस्ट बस चालकाविरोधात गुन्हा दाखल करण्यात आला आहे. दुर्घटनेनंतर बस चालक फरार असून पोलीस त्याचा शोध घेत आहेत.

प्रभादेवीतील अप्पासाहेब मराठे रोडवर शनिवारी रात्री साडेनऊच्या सुमारास ही घटना घडली. बस भरधाव वेगात होती. यादरम्यान डिलिव्हरी बॉय अचानक समोर आला. यावेळी बस वेगात असल्याने चालकाला नियंत्रण मिळवता आले नाही आणि डिलिव्हरी बॉय बसखाली आला.

सार्थक जंगम (21) असे मयत डिलिव्हरी बॉयचे नाव असून तो वरळी कोळीवाडा येथीव रहिवासी आहे. या घटनेनंतर स्थानिक नागरिक आक्रमक झाले असून, बस चालकाविरोधात कडक कारवाईची मागणी केली आहे. पोलीस फरार चालकाचा शोध घेत आहेत. सध्या प्रकरणाचा तपास सुरू असून, आरोपीविरोधात कठोर कारवाई करण्याचे आश्वासन पोलिसांनी दिले.