इंडियन प्रीमियर लीग २०२५ स्पर्धेत रॉयल चॅलेंजर्स बंगळुरूने रविवारी (२७ एप्रिल) दिल्ली कॅपिटल्सला ६ विकेट्सने पराभूत केले. अरुण जेटली स्टेडियमवर झालेल्या या सामन्यात अनेक नाट्यमय घटना घडल्या. यात बंगळुरूच्या कर्णधाराची विकेटही चर्चेचा विषय ठरला.

या सामन्यात दिल्लीने बंगळुरूसमोर विजयासाठी १६३ धावांचे लक्ष्य ठेवले होते. या लक्ष्याचा पाठलाग करताना अक्षर पटेलने तिसऱ्या षटकात जेकॉब बेथल आणि देवदत्त पडिक्कल यांना बाद केले. असं असताना कर्णधार रजत पाटिदार साथ देण्यासाठी आला होता. पण चौथ्या षटकाच्या शेवटच्या चेंडूवर गोंधळ झाला.

मुकेश कुमारच्या गोलंदाजीवर विराटने मिड-विकेटच्या दिशेने शॉट खेळला. त्यावेळी नॉन-स्ट्रायकरला असलेला पाटिदार धाव घेण्यासाठी धावला. मात्र करुण नायरने चपळाईने चेंडू पकडला, त्यामुळे विराटने पाटिदारला मागे धाडले.

पण परत क्रिजमध्ये येईपर्यंत करुणनने थेट नॉनस्ट्रायकरच्या स्टंपवर चेंडू मारला होता. त्यामुळे पाटिदारला ६ धावांवर धावबाद होऊन माघारी परतावे लागले. याचा व्हिडिओही व्हायरल झाला आहे.