मुंबई : आशियाई बाजारातील तेजीच्या पार्श्वभूमीवर सोमवारी २८ एप्रिल रोजी भारतीय शेअर बाजारातील सेन्सेक्स आणि निफ्टीने मोठी उसळी घेतली. निर्देशांकात मोठे वजन असलेल्या रिलायन्स इंडस्ट्रीजच्या शेअर्समध्ये मोठ्या प्रमाणात खरेदी झाल्याने बाजाराला तेजी मिळाली. याशिवाय, बँकिंग शेअर्समधील वाढीमुळेही बाजार तेजीत होते. सेन्सेक्स १,००५.८४ अंकांनी वधारून ८०,२१८.३७ वर बंद झाला. तर निफ्टी २८९.१५ अंकांनी वाढून २४,३२८.५० वर बंद झाला. क्षेत्रीय निर्देशांकांत आयटी वगळता इतर सर्व निर्देशांक वधारून बंद झाले. यामध्ये धातू, रिअल्टी, तेल आणि वायू, फार्मा, सार्वजनिक क्षेत्रातील बँकांचे शेअर १-३ टक्क्यांनी वाढले.गेल्या आठ दिवसांपासून परदेशी गुंतवणूकदारांनी (एफआयआय) केलेली सततची खरेदी हे बाजाराच्या मजबूतीला कारणीभूत ठरणारे प्रमुख घटक आहे. एफआयआयनी त्यांची सतत विक्रीची रणनीती बदलली आहे आणि खरेदीची भूमिका स्वीकारली आहे. आज निफ्टीमध्ये रिलायन्स इंडस्ट्रीज, एसबीआय लाईफ, भारत इलेक्ट्रॉनिक्स, सन फार्मा, जेएसडब्ल्यू स्टील हे सर्वाधिक वधारले. तर श्रीराम फायनान्स, एचसीएल टेक्नॉलॉजीज, एटरनल, अल्ट्राटेक सिमेंट, एचयूएल हे सर्वाधिक घसरले.सोमवारी सुरुवातीच्या व्यवहारात रिलायन्स इंडस्ट्रीज (RIL) चे शेअर्स ५.०७ टक्क्याने वाढून १,३६६.३० रुपयांवर बंद झाले. रिलायन्सचे मार्च तिमाहीचे निकाल अपेक्षेपेक्षा चांगले आल्यानंतर शेअरमध्ये खरेदी दिसून आली. ट्रेडिंगच्या पहिल्या ३ मिनिटांत एनएसई काउंटरवर ३३ लाखांहून अधिक शेअर्सचे व्यवहार झाले.शुक्रवारी भारतीय शेअर बाजार घसरणीसह बंद झाले. पंपोर (पहलगाम) दहशतवादी हल्ल्यानंतर भारत आणि पाकिस्तानमधील वाढत्या तणावाच्या पार्श्वभूमीवर गुंतवणूकदारांनी नफा बुकिंगचा मार्ग अवलंबला. सेन्सेक्स ५८८.९० अंकांनी किंवा ०.७४% ने घसरून ७९,२१२.५३ वर बंद झाला. त्याच वेळी, निफ्टी ५० २०७.३५ अंकांनी म्हणजेच ०.८६% ने घसरला आणि २४,०३९.३५ वर बंद झाला.