पुणे – महाराष्ट्राच्या सांस्कृतिक राजधानी पुण्यात मध्यरात्री एक खळबळजनक घटना समोर आली आहे. एका पतीने स्वतःच्या पत्नीचा गळा दाबून खून केला आणि मृतदेह दुचाकीवरून नेत असताना त्याला पोलिसांनी अटक केली. या घटनेने संपूर्ण पुण्यात खळबळ उडाली असून, पोलिस अधिक तपास करत आहेत.

ही घटना बुधवारी मध्यरात्री सुमारे 1:30 वाजता घडली. नांदेड सिटी पोलिस ठाण्याच्या हद्दीत ही धक्कादायक घटना समोर आली आहे. मृत महिलेचे नाव बबिता राकेश निसार असून आरोपी पतीचे नाव राकेश रामनायक निसार आहे.

घटनेनंतर आरोपी राकेशने आपल्या पत्नीचा मृतदेह दुचाकीवर बसवला आणि भूमकर पुलाच्या दिशेने गाडी घेतली. तो स्वामीनारायण मंदिराच्या दिशेने निघाला असताना, आणि भारती विद्यापीठ पोलीस ठाण्याच्या पथकांनी त्याला संशयावरून अडवले. पोलिसांनी चौकशी केली असता धक्कादायक प्रकार उघडकीस आला आणि तात्काळ राकेशला अटक करण्यात आली.

सद्यस्थितीत राकेशने हा खून नेमका कोणत्या कारणासाठी केला याचे नेमके कारण समजू शकलेले नाही. नांदेड सिटी पोलिस ठाण्याचे अधिकारी या प्रकरणाचा सखोल तपास करत आहेत. पोलिस राकेशची चौकशी करत असून त्याच्या मोबाइल कॉल रेकॉर्ड्स, घरगुती संबंध आणि इतर बाबींचा तपास घेत आहेत.

या घटनेमुळे परिसरात भीतीचे वातावरण पसरले असून स्थानिक नागरिकांमध्ये खळबळ उडाली आहे. मध्यरात्री पत्नीचा खून करून मृतदेह सार्वजनिक ठिकाणी घेऊन जाण्याचा प्रकार अत्यंत धक्कादायक असल्याची प्रतिक्रिया स्थानिकांनी व्यक्त केली.

पोलिसांनी आरोपीला ताब्यात घेतले असून त्याच्यावर खुनाचा गुन्हा दाखल करण्यात आला आहे. आरोपीविरुद्ध भारतीय दंड विधानाच्या कलम 302 अंतर्गत गुन्हा नोंदवण्यात आला आहे. शवविच्छेदनासाठी मृतदेह ससून रुग्णालयात पाठवण्यात आला असून अहवाल आल्यानंतर पुढील तपासाची दिशा ठरवली जाईल.

पोलिसांनी प्राथमिक चौकशीत दोघांमध्ये गेल्या काही दिवसांपासून वाद सुरू असल्याची माहिती मिळवली आहे. मात्र, त्यातून खुनाच्या टोकाला राकेश गेला की अन्य कोणताही मानसिक किंवा सामाजिक दबाव होता, हे अद्याप स्पष्ट झालेले नाही.