Getty Images ஆர்சிபி அணிக்கு அடுத்ததாக லக்னெள, சன்ரைசர்ஸ், கொல்கத்தா அணிகளுக்கு இடையே ஆட்டங்கள் உள்ளன

இந்த ஐபிஎல் சீசனில் ப்ளே ஆஃப் செல்லாமல் 3வது அணியாக சன்ரைசர்ஸ் ஹைதராபாத் அணி வெளியேறியது. இதனால் ப்ளே ஆஃப் சுற்றில் 4 இடங்களுக்கு 7 அணிகளுக்கு இடையே கடும் போட்டி ஏற்பட்டுள்ளது.

ஹைதராபாத்தில் நேற்று சன்ரைசர்ஸ் ஹைதராபாத் மற்றும் டெல்லி கேபிடல்ஸ் அணிகளுக்கு இடையே நடக்கவிருந்த ஆட்டம் மழை காரணமாக ரத்து செய்யப்பட்டது. டெல்லி அணி முதலில் பேட் செய்து 7 விக்கெட் இழப்புக்கு 133 ரன்கள் எடுத்த நிலையில் ஆட்டத்தில் மழை குறுக்கிட்டது. இந்த மழை தொடர்ந்து நீடித்ததால் மேற்கொண்டு நடத்த முடியாத சூழல் ஏற்பட்டது. ஆகவே ஆட்டம் ரத்து செய்யப்பட்டு, இரு அணிகளுக்கும் தலா ஒரு புள்ளி வழங்கப்பட்டது.

இந்த ஆட்டம் ரத்து செய்யப்பட்டதைத் தொடர்ந்து, ப்ளே ஆஃப் செல்லும் வாய்ப்பை சன்ரைசர்ஸ் ஹைதராபாத் அணி இழந்தது. 11 போட்டிகளில் 7 புள்ளிகளுடன் சன்ரைசர்ஸ் அணி இருக்கிறது. இன்னும் 3 போட்டிகளில் அந்த அணி விளையாடி வென்றாலும் 13 புள்ளிகள்தான் பெற முடியும். இது ப்ளே ஆஃப் சுற்றுக்குள் செல்லப் போதுமானதாக இருக்காது.

இதையடுத்து ப்ளே ஆஃப் செல்லாமல் வெளியேறிய அணிகளின் எண்ணிக்கை சிஎஸ்கே, ராஜஸ்தான் ராயல்ஸ், சன்ரைசர்ஸ் என 3 அணிகளாக அதிகரித்துள்ளது. அதேநேரம், ப்ளே ஆஃப் சுற்றில் 4 இடங்களுக்காக 7 அணிகளுக்கு இடையே கடும் போட்டி நிலவுகிறது.

இதில் லக்னெள, கொல்கத்தா அணிகளின் நிலைமை கம்பி மீது நடப்பது போல் இருக்கிறது. இந்த இரு அணிகளும் ஏதாவது ஒரு தோல்வியைச் சந்தித்தாலும் தொடரிலிருந்து வெளியேற வேண்டிய நிலையில் இருக்கின்றன.

ராயல் சேலஞ்சர்ஸ் பெங்களூரு

போட்டிகள்: 11, புள்ளிகள்: 16, நிகரரன்ரேட்: 0.482.

எஞ்சியுள்ள போட்டிகள்: லக்னௌ, சன்ரைசர்ஸ் ஹைதராபாத், கொல்கத்தா

ஆர்சிபி அணி 16 புள்ளிகளுடன் முதலிடத்தில் இருக்கிறது. இருப்பினும் நிகர ரன்ரேட் குஜராத், மும்பை அணியைவிட குறைவாக இருப்பதால் நிகர ரன்ரேட்டை உயர்த்த வேண்டிய நிலையில் இருக்கிறது.

ஆர்சிபி அணிக்கு அடுத்ததாக லக்னெள, சன்ரைசர்ஸ், கொல்கத்தா அணிகளுக்கு இடையே ஆட்டங்கள் உள்ளன. இதில் கொல்கத்தா, லக்னெள அணிகளை ஆர்சிபி வென்றாலே அந்த அணிகளின் தலைவிதி தெரிந்துவிடும். ஆர்சிபி அணியைப் பொருத்தவரை அடுத்து வரும் 3 போட்டிகளில் குறைந்தபட்சம் ஒரு போட்டியை வென்றாலே 18 புள்ளிகளுடன் முடிக்க முடியும், 18 புள்ளிகள் வரை 5 அணிகளும் எடுக்க வாய்ப்புள்ளது.

அதாவது ஆர்சிபி அணி ப்ளே ஆஃப் செல்ல நிகர ரன்ரேட்டை பொருட்டாகக் கருத வேண்டாம் என்றால் இன்னும் 2 வெற்றிகள் அவசியம். சொந்த மைதானத்தில் தொடரந்து 2 போட்டிகளை ஆர்சிபி வென்றது அந்த அணிக்கு மகிழ்ச்சியை அளித்துள்ளது.

அடுத்து வரக்கூடிய 3 ஆட்டங்களில் சன்ரைசர்ஸ் அணி ஏற்கெனவே வெளியேறிவிட்டதால் அந்த அணிக்கு வெற்றி தோல்வி பாதிக்காது, ஆர்சிபி எளிதாக வென்றுவிடலாம். ஆனால், கொல்கத்தா, லக்னெள அணிகளை ஆர்சிபி வெல்லும்பட்சத்தில் அந்த அணிகளின் ப்ளே ஆஃப் வாய்ப்பு சிக்கலாகும்.

பஞ்சாப் கிங்ஸ் Getty Images பஞ்சாப் கிங்ஸ் அணி 15 புள்ளிகளுடன் 2வது இடத்தில் இருக்கிறது

போட்டிகள்: 11, புள்ளிகள்: 15, ரன்ரேட்: 0.376,

எஞ்சியுள்ள போட்டிகள்: டெல்லி, மும்பை, ராஜஸ்தான்

பஞ்சாப் கிங்ஸ் அணி 15 புள்ளிகளுடன் 2வது இடத்தில் இருக்கிறது, ஆனால், நிகர ரன்ரேட் அடிப்படையில் குஜராத், மும்பையைவிட குறைவாக இருக்கிறது.

ப்ளே ஆஃப் சுற்றில் இடம் பிடிக்க பஞ்சாப் அணிக்கு எஞ்சியுள்ள 3 போட்டிகளில் குறைந்தபட்சம் 2 வெற்றிகள் தேவை. அப்போதுதான் 19 புள்ளிகளுடன் இடத்தை உறுதி செய்ய முடியும்.

ராஜஸ்தான் அணி ஏற்கெனவே வெளியேறிவிட்ட நிலையில் அந்த அணியையும், மும்பை அல்லது டெல்லி அணியையும் வென்றால் ப்ளே ஆஃப் சுற்றை உறுதி செய்யலாம். ஒருவேளை பஞ்சாப் அணி 3 போட்டிகளிலும் தோல்வி அடைந்தால், மற்ற அணிகளின் வெற்றி தோல்விக்காகக் காத்திருக்க வேண்டியதிருக்கும்.

Getty Images குஜராத் அணி வீரர் முகமது சிராஜ் குஜராத் டைட்டன்ஸ்

போட்டிகள்: 10, புள்ளிகள் 14, ரன்ரேட்: 0.867,

எஞ்சியுள்ள போட்டிகள்: மும்பை, டெல்லி, லக்னெள, சிஎஸ்கே

குஜராத் அணி ப்ளே ஆஃப் செல்வதற்கான வாய்ப்புகள் பிரகாசமாக உள்ளன. 14 புள்ளிகளுடன் வலுவான நிகர ரன்ரேட்டில் இருக்கிறது. குஜராத் அணியைப் பொருத்தவரை அடுத்து வரும் 4 போட்டிகளில் 2 போட்டிகளில் வென்றாலே ப்ளே ஆஃப் சுற்றை உறுதி செய்ய நிகர ரன்ரேட் துணை செய்யும்.

அதிலும் சொந்த மைதானத்தில் நடக்கும் 3 ஆட்டங்களில் 2 வெற்றி கிடைத்தாலே போதுமானது. சிஎஸ்கே, லக்னெள அணிகள் தடுமாறி வரும் நிலையில் அந்த அணிகளுக்கு எதிரான வெற்றி குஜராத்தை ப்ளே ஆஃப் சுற்றுக்குக் கொண்டு செல்லும்.

மும்பை இந்தியன்ஸ் Getty Images மும்பை அணி வலுவான ரன்ரட்டில் 14 புள்ளிகளுடன் இருக்கிறது.

போட்டிகள்: 11, புள்ளிகள்: 14, ரன்ரேட்: 1.124,

எஞ்சியுள்ள ஆட்டங்கள்: குஜராத், பஞ்சாப், டெல்லி

மும்பை அணி வலுவான ரன்ரட்டில் 14 புள்ளிகளுடன் இருக்கிறது. அடுத்து வரக்கூடிய 3 ஆட்டங்களுமே மும்பை அணிக்கு சவாலானதுதான். இதில் குறைந்தபட்சம் 2 வெற்றி இருந்தாலே மும்பை அணி ப்ளே ஆஃப் சுற்றில் 18 புள்ளிகளுடன் டாப்-2 இடத்தைப் பிடிக்கலாம்.

ஏனென்றால் மற்ற அனைத்து அணிகளையும்விட ரன்ரேட் மும்பை அணிக்குத்தான் வலுவாக இருக்கிறது. இதில் சொந்த மைதானத்தில் 2 ஆட்டங்கள் இருப்பதால், மும்பையின் இரு வெற்றிகள் அந்த அணியை ப்ளே ஆஃப் சுற்றுக்கு இட்டுச் செல்லும்.

Getty Images ப்ளே ஆஃப் செல்ல டெல்லி அணிக்கு குறைந்தபட்சம் 2 வெற்றிகளாவது தேவை டெல்லி கேபிடல்ஸ்

போட்டிகள்:11, புள்ளிகள்: 13, ரன்ரேட்: 0.362,

மீதமுள்ள ஆட்டங்கள்: பஞ்சாப், குஜராத், மும்பை

டெல்லி அணி தொடக்கத்தில் 6 போட்டிகளில் 5 வெற்றிகளுடன் முதலிடத்தில் இருந்தது. ஆனால், அதன் பிறகு 6வது இடத்துக்குச் சரிந்து, கடைசி 4 போட்டிகளில் 3 புள்ளி மட்டுமே கிடைத்துள்ளது.

டெல்லி அணிக்கு அடுத்து வரக்கூடிய குஜராத், பஞ்சாப், மும்பை அணிகளுக்கு இடையிலான ஆட்டம் மிகவும் சவாலானது. ப்ளே ஆஃப் செல்ல டெல்லி அணிக்கு குறைந்தபட்சம் 2 வெற்றிகளாவது தேவை.

ஆனாலும் 17 புள்ளிகள் ப்ளே ஆஃப் வாய்ப்பை உறுதி செய்யுமா என்று கூற முடியாது. மும்பை, பஞ்சாப், குஜராத் அணிகளை வீழ்த்துவதும் எளிதானது அல்ல. டெல்லி அணிக்கு அடுத்து வரக்கூடிய 3 போட்டிகளிலும் வெல்வதுதான் ப்ளே ஆஃப் செல்வதற்கான எளிய வழி.

கொல்கத்தா நைட் ரைடர்ஸ் Getty Images கொல்கத்தா அணி ஒரு தோல்வியைத் தழுவினாலும்கூட தொடரிலிருந்து வெளியேறிவிடும்

போட்டிகள்: 11, புள்ளிகள்: 11, ரன்ரேட்: 0.249,

எஞ்சியுள்ள ஆட்டங்கள்: சிஎஸ்கே, சன்ரைசர்ஸ், ஆர்சிபி

நடப்பு சாம்பியன் கொல்கத்தா அணி மதில்மேல் பூனையாக நிற்கிறது. அடுத்து வரக்கூடிய 3 ஆட்டங்களில் வென்றாலும்கூட 17 புள்ளிகள்தான் கிடைக்கும். இது ப்ளே ஆஃப் சுற்றில் கடைசி இடத்தைப் பிடிக்கப் போதுமானதாக இருக்குமா என்று உறுதியாகக் கூற முடியாது.

ஐந்து அணிகள் 18 புள்ளிகள் வரை எடுக்க வாய்ப்பிருக்கும்போது கொல்கத்தா அணியின் 17 புள்ளிகள் ப்ளே ஆஃப் வாய்ப்பைப் பெற்றுத் தராது.

கொல்கத்தா அணி அடுத்து மோதும் சிஎஸ்கே, சன்ரைசர்ஸ் அணிகள் தொடரில் இருந்து வெளியேறிவிட்டதால், அந்த அணிகளை வெற்றி தோல்வி பாதிக்காது. ஆனால், கொல்கத்தா அணி ஒரு தோல்வியைத் தழுவினாலும்கூட தொடரிலிருந்து வெளியேறிவிடும்.

Getty Images லக்னெள அணி கேப்டன் ரிஷப் பன்ட் லக்னெள சூப்பர் ஜெயின்ட்ஸ்

போட்டிகள்: 11, புள்ளிகள்:10, ரன்ரேட்: -0.469,

எஞ்சியுள்ள ஆட்டங்கள்: ஆர்சிபி, குஜராத், சன்ரைசர்ஸ்

லக்னெள அணி ப்ளே ஆஃப் செல்லும் வாய்ப்பு மிகக் குறைவாக இருக்கிறது. அடுத்து வரும் 3 ஆட்டங்களிலும் பிரமாண்ட வெற்றி பெற்றால்தான் 16 புள்ளிகளுடன், நிகர ரன்ரேட்டையும் உயர்த்த முடியும். 16 புள்ளிகள்கூட ப்ளே ஆஃப் செல்ல முடியுமா என்பதை உறுதி செய்யாது.

ஆர்சிபி, குஜராத் அணிகள் ஏற்கெனவே 16 புள்ளிகளை நெருங்கிவிட்ட நிலையில் கடைசி இரு இடங்களுக்குத்தான் லக்னெள போட்டியிட முடியும். எஞ்சிய 3 ஆட்டங்களில் ஆர்சிபி, குஜராத்தை வெல்வது லக்னெளவுக்கு கடினமான பணி. நிகர ரன்ரேட்டும் மோசமாக இருப்பதால், ஒரு தோல்வி அடைந்தாலே லக்னெளவின் ப்ளே ஆஃப் கனவு முடிவுக்கு வந்துவிடும்.

- இது பிபிசிக்காக கலெக்டிவ் நியூஸ்ரூம் வெளியீடு.