पुन्हा एकदा भारताने दहशतवादाविरोधातील आपली निती स्पष्ट करत, जम्मू-काश्मीरच्या पहलगाममध्ये झालेल्या अतिरेकी हल्ल्यानंतर सोमवारी रात्री 'ऑपरेशन सिंदूर' राबवले. या गुप्त ऑपरेशन अंतर्गत भारतीय वायुसेनेने पाकिस्तान आणि पाकव्याप्त काश्मीरमधील 9 दहशतवादी तळांवर हवाई हल्ले केले. हे हल्ले रात्री 1:30 वाजता करण्यात आले आणि यामागचा उद्देश होता, दहशतवाद्यांचे लॉंचपॅड्स आणि शस्त्रास्त्र साठ्याचा नाश करणे.
बहावलपूर, कोटली आणि मुजफ्फराबादमध्ये मोठा हल्लासूत्रांच्या माहितीनुसार, मिराज-2000 आणि सुखोई-30 एमकेआय सारख्या अत्याधुनिक लढाऊ विमानांनी बहावलपूर, कोटली आणि मुजफ्फराबाद येथील टार्गेट्सवर अचूक हल्ले केले. हे भाग जैश-ए-मोहम्मद आणि लश्कर-ए-तोयबा यांसारख्या दहशतवादी संघटनांचे बालेकिल्ले मानले जात होते.
पाकिस्तानचा प्रतिउत्तर म्हणून एलओसीवर तोफखाना उघडलाभारतीय कारवाईनंतर पाकिस्ताननेही युद्धविरामाचा भंग करत पुंछ-राजौरी सेक्टरमधील भींबर गली भागात तोफेचा मारा केला. मात्र भारतीय लष्कराने संतुलित व चोख प्रत्युत्तर दिले असून, नियंत्रण रेषेवर सुरक्षेसाठी सगळी तयारी पूर्ण असल्याचे सैनिकी अधिकाऱ्यांनी स्पष्ट केले आहे.
भारताची वायुसेना सज्जरक्षा विभागाच्या अधिकाऱ्यांनी सांगितले की, भारत-पाकिस्तान सीमेवरील सर्व वायु संरक्षण यंत्रणा सज्ज ठेवण्यात आल्या आहेत. कोणतीही परिस्थिती उद्भवली तरी तातडीने प्रत्युत्तर देता येईल अशी तयारी करण्यात आली आहे.
भारतीय हल्ल्यांवर प्रतिक्रिया देताना अमेरिकेचे माजी अध्यक्ष डोनाल्ड ट्रंप म्हणाले, “ही परिस्थिती चिंताजनक आहे. आम्ही नुकतेच याची माहिती घेतली. भारत आणि पाकिस्तान यांच्यातील हा संघर्ष फार जुना आहे, पण मी आशा करतो की हे तणाव लवकरच संपतील.”
'भारत माता की जय'रक्षा मंत्री राजनाथ सिंह यांनी ऑपरेशननंतर ‘भारत माता की जय’ असा संदेश दिला. केंद्रीय मंत्री पीयूष गोयल आणि शिवसेना (UBT) नेत्या प्रियंका चतुर्वेदी यांनीही भारताच्या लष्करी कारवाईचे समर्थन करत, “हर माथे का सिंदूर मिटने ना देंगे,” असे म्हणत जवानांना सलाम केला.
पाकिस्तानच्या आयएसपीआरच्या अधिकाऱ्याने कोटली, बहावलपूर आणि मुजफ्फराबाद येथे भारतीय क्षेपणास्त्र हल्ल्यांची कबुली दिली असून, भारताला योग्य वेळी आणि ठिकाणी प्रत्युत्तर देण्यात येईल, असा इशारा दिला आहे. मात्र भारताकडून मिळालेल्या चोख प्रत्युत्तरामुळे पाकिस्तानची रणनीती गोंधळलेली दिसते.
भारतीय हवाई दलाच्या 'ऑपरेशन सिंदूर'ने दहशतवाद्यांना मोठा धक्का दिला असून, भारताने पुन्हा एकदा स्पष्ट केले आहे की, देशाच्या सुरक्षेच्या बाबतीत कोणतीही तडजोड केली जाणार नाही. सीमेवरील तणाव वाढला असला तरी भारतीय लष्कर आणि वायुसेना दोन्ही सज्ज आहेत. पाकिस्तानकडून धमक्या दिल्या जात असल्या, तरी भारताच्या सजगतेपुढे त्या निष्फळ ठरतील, हे स्पष्ट आहे.
