IPL 2025 vs Rajasthan Royals: चेन्नई सुपर किंग्सने इंडियन प्रीमिअर लीग २०२५ च्या लढतीत राजस्थान रॉयल्सविरुद्ध आव्हानात्मक धावसंख्या उभी केली. आयुष म्हात्रे व डेवॉल्ड ब्रेव्हिसच्या फटकेबाजीला शिवम दुबे व महेंद्रसिंग धोनी यांची साथ मिळाली. राजस्थानच्या युधवीर सिंगने सुरुवातीला CSK ला धक्के दिले होते, परंतु चेन्नईने चांगले पुनरागमन केले.

• राजस्थानने फझलहक फारुकीच्या जागी युधवीर सिंगला, तर चेन्नईने मथिशा पथिराणाच्या जागी शिवम दुबेला प्लेइंग इलेव्हनमध्ये स्थान दिले.

• चेन्नई सुपर किंग्स - आयुष म्हात्रे, डेव्हॉन कॉनवे, उर्विल पटेल, रवींद्र जडेजा, डेवॉल्ड ब्रेव्हिस, शिवम दुबे, महेंद्रसिंग धोनी, आर अश्विन, नूर अहमद, अंशूल कंबोज, खलील अहमद.

• राजस्थान रॉयल्स - यशस्वी जैस्वाल, वैभव सूर्यवंशी, संजू सॅमसन, रियान पराग, ध्रुव जुरेल, शिमरोन हेटमायर, वनिंदू हसरंगा, क्वेमा मफाका, युधवीर सिंग, तुषार देशपांडे, आकाश मढवाल.

बऱ्याच दिवसांनी परतलेल्या डेवॉन कॉनवेला ( १०) दुसऱ्या षटकात युधवीर सिंगने माघारी पाठवले. युधवीरने त्याच षटकाच्या शेवटच्या चेंडूवर उर्विल पटेलला भोपळ्यावर बाद करून चेन्नईला १२ धावांत दुसरा धक्का दिला. आर अश्विनला चौथ्या क्रमांकावर फलंदाजीला पाठवले. युधवीरच्या पुढच्या षटकात आयुष-अश्विन जोडीने २४ धावा कुटल्या. या जोडीने २२ चेंडूंत अर्धशतकीय भागीदारी पूर्ण केली. आयुष २० चेंडूंत ८ चौकार व १ षटकारासह ४३ धावांवर बाद झाला. मफाकाने सुरेख झेल टिपला अन् तुषार देशपांडेला ही विकेट मिळाली.