IPL 2025 Chennai Super Kings vs Rajasthan Royals: राजस्थान रॉयल्सने इंडियन प्रीमिअर लीग २०२५ मध्ये १४ सामन्यांत ४ विजय मिळवून स्पर्धेचा निरोप घेतला. अखेरच्या साखळी सामन्यांत त्यांनी चेन्नई सुपर किंग्सला ६ विकेट्स व १७ चेंडू राखून सहज पराभव केला. चेन्नईच्या ८ बाद १८७ धावांचा त्यांनी १७.१ षटकांत ४ बाद १८८ धावा करून यशस्वी पाठलाग केला. वैभव सूर्यवंशी ( Vaibhav Suryavanshi) या सामन्यात सर्वाधिक धावा करणारा फलंदाज ठरला आणि सामन्यानंतर तो चक्क महेंद्रसिंग धोनीच्या ( MS Dhoni) पाया पडला.

चेन्नई सुपर किंग्सकडून आयुष म्हात्रे ( ४३), डेवॉल्ड ब्रेव्हिस ( ४२) व शिवम दुबे ( ३९) यांनी दमदार खेळ केला, परंतु मधल्या फळीतील अपयशामुळे संघाला २०-३० धावा कमी करता आल्या. राजस्थानकडून युधवीर सिंग व आकाश मढवाल यांनी प्रत्येकी ३ विकेट्स घेतल्या. फलंदाजीत RR कडून यशस्वी जैस्वाल ( ३६) व वैभव ( ५७) यांनी आक्रमक सुरुवात करून दिली. संजू सॅमसन ( ४१) व वैभव यांनी ९८ धावांची भागीदारी केली. ध्रुव जुरेलने १२ चेंडूंत नाबाद ३१ धावा करून संघाचा विजय पक्का केला. शिमरोन हेटमायर ५ चेंडूंत १२ धावांवर नाबाद राहिला. सामन्यानंतर वैभवने चेन्नईचा कर्णधार महेंद्रसिंग धोनीच्या पाया पडला.