मुंबई : विमान कंपनी इंडिगो चालवणारी इंटरग्लोब एव्हिएशन लिमिटेडने २१ मे रोजी त्यांचे तिमाही निकाल (IndiGo Q4 Results) जाहीर केले. यासोबतच कंपनीने आपल्या भागधारकांसाठी चांगला लाभांशही जाहीर केला आहे. इंडिगोने ३१ मार्च २०२५ रोजी संपलेल्या तिमाहीत ३,०६७.५ कोटी रुपयांचा निव्वळ नफा नोंदवला. सलग दुसऱ्या तिमाहीत कंपनीने नफा मिळवला आहे. गेल्या वर्षी याच तिमाहीत कंपनीने १,८९४.८ कोटी रुपयांचा नफा कमावला होता. कंपनीच्या या उल्लेखनीय कामगिरीमध्ये भारतातील वाढत्या देशांतर्गत प्रवास मागणीने महत्त्वाची भूमिका बजावली. इतका लाभांश जाहीरइंटरग्लोब एव्हिएशन लिमिटेडने भागधारकांसाठी प्रति शेअर १० रुपये (१००%) लाभांश जाहीर (InterGlobe Aviation declared dividend) केला आहे. हा लाभांश आगामी वार्षिक सर्वसाधारण सभेत (एजीएम) भागधारकांच्या मंजुरीनंतर ३० दिवसांच्या आत वितरित केला जाईल. बीएसईवर इंडिगोचे शेअर्स २१ मेरोजी ०.४ टक्क्यांनी वाढून ५,४६५.६५ रुपयांवर बंद झाले. तिकिटांमधून मिळणारा महसूलतिमाहीत इंडिगोचा EBITDAR (व्याज, कर, घसारा, परिशोधन आणि भाडेपूर्व उत्पन्न) ६,९४८.२ कोटी रुपये राहिला आहे. हा आकडा जो गेल्या वर्षीच्या ४,४१२.३ कोटी रुपयांपेक्षा लक्षणीयरीत्या जास्त आहे. मार्जिन २४.८ टक्क्यांवरून ३१.४ टक्क्यांपर्यंत वाढले. प्रवासी तिकिटांमधून मिळणारा महसूल २५.४ टक्क्यांनी वाढून १९,५६७.३ कोटी रुपये झाला आणि इतर सहाय्यक सेवांमधून मिळणारा महसूल २५.२ टक्क्यांनी वाढून २,१५२.५ कोटी रुपये झाला. ऑपरेटिंग उत्पन्नकंपनीचे ऑपरेटिंग उत्पन्न २४ टक्क्यांनी वाढून २२,१५१.९ कोटी रुपये झाले आहे, जे गेल्या वर्षी १७,८२५.३ कोटी रुपये होते. मात्र, ही रक्कम २२,५०० कोटी रुपयांच्या अंदाजापेक्षा थोडी कमी होती. इंडिगोचा प्रति किलोमीटर महसूल २.४ टक्क्यांनी वाढून ५.३२ रुपये झाला. प्रवाशांच्या आसनांचा वापर किंवा लोड फॅक्टर १.१ टक्क्यांनी वाढून ८७.४ टक्क्यांवर पोहोचला. या तिमाहीत इंडिगोने २७.७ दशलक्ष प्रवाशांची वाहतूक केली आणि ६४.३ टक्के बाजारपेठेतील वाटा काबीज केला. गेल्या वर्षी कंपनीने २३.६ दशलक्ष प्रवासी वाहतूक केली आणि तिचा बाजारातील वाटा ६०.३ टक्के होता. इंधनाच्या किमतींमुळे कामकाजावर परिणाममात्र, वाढत्या इंधनाच्या किमतींमुळे कंपनीच्या कामकाजावर परिणाम झाला. प्रति उपलब्ध सीट किलोमीटर (RASK) महसूल ५.२६ रुपये होता. तर प्रति उपलब्ध सीट किलोमीटर (CASK) खर्च ४.५१ रुपये होता. कंपनीचे एकूण कर्ज ३०.३ टक्क्यांनी वाढून ६६,८०९.८ कोटी रुपये झाले. परंतु रोख राखीव रक्कम ३८.७ टक्क्यांनी वाढून ४८,१७०.५ कोटी रुपये झाली, ज्यामध्ये ३३,१५३.१ कोटी रुपयांची रोख रक्कम समाविष्ट आहे. इंडिगोकडे ४३४ विमानांचा ताफा होता आणि तिमाहीत त्यांनी सर्वाधिक २,३०४ दैनिक उड्डाणे चालवली.